Ўзбекистонда гиёҳвандлик воситалари билан боғлиқ жиноятлар учун жавобгарлик кучайтирилади

Ўзбекистонда гиёҳвандлик воситалари билан боғлиқ жиноятлар учун жавобгарлик чоралари кучайтирилади. Бу ҳақда Олий суд томонидан ишлаб чиқилиб, муҳокама учун эълон қилинган қонун лойиҳасида кўзда тутилган.

“Ҳуқуқбузарликларни олдини олиш ва жиноятчиликка қарши курашиш тартиби такомиллаштирилиши муносабати билан Ўзбекистон Республикаси Жиноят кодексига ўзгартириш ва қўшимчалар киритиш тўғрисида”ги қонун лойиҳасида қайд этилишича, гиёҳвандлик воситалари, уларнинг аналоглари ёки психотроп моддаларни қонунга хилоф равишда ўтказиш ҳолатлари кўпайиб бормоқда, бу эса ўз навбатида, гиёҳвандлик воситалари, уларнинг аналоглари ёки психотроп моддаларини кўпайиб боришига, уларнинг истеъмолига вояга етмаганларни кенг жалб этиш ҳолатлари ошиб боришига олиб келмоқда.

Ушбу ҳолатлар, мазкур қилмишлар учун жавобгарликни қайта кўриб чиқиш заруратини юзага келтирмоқда.

Шу муносабат билан, қонун билан тақиқланган экинларни етиштириш, гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ҳамда уларни қонунга хилоф равишда ўтказиш, шунингдек, уларни ўтказиш мақсадини кўзламай қонунга хилоф равишда тайёрлаш, эгаллаш, сақлаш учун жавобгарлик чоралари кучайтирилмоқда.

Хусусан, 270-моддасида (тақиқланган экинларни етиштириш) белгиланган жиноятни содир этганлик учун БҲМнинг 35 бараваридан 60 бараваригача миқдорда жарима ёки 360 соатгача мажбурий жамоат ишлари ёки 3 йилгача ахлоқ тузатиш ишлари ёхуд 1 йилдан 3 йилгача озодликни чеклаш ёки бир йилдан 3 йилгача озодликдан маҳрум қилиш билан жазолаш кўзда тутилмоқда. Амалда бу жиноят учун жарима миқдори БҲМнинг 25 бараваридан бошланади.

Ўша ҳаракат:

• илгари гиёвандлик воситалари ёки психотроп моддалар билан қонунга хилоф равишда муомала қилишдан иборат жиноятни содир этган шахс томонидан;
• бир гуруҳ шахслар томонидан олдиндан тил бириктириб;
• ўртача катталикдаги экин майдонида содир этилган бўлса, —

БҲМнинг 60 бараваридан 100 бараваригача миқдорда жарима ёки 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазолаш белгиланмоқда. Амалда ушбу жиноят учун жарима миқдори БҲМнинг 50 бараваридан бошланади.

Ушбу ҳужжат муҳокамаси 27 октябргача давом этади.