Jizzax va Qashqadaryoda qariyb salkam 15,5 kilo giyohvandlik vositasining noqonuniy savdosiga chek qo‘yildi, deb xabar bermoqda DXX matbuot xizmati.
DXXning Jizzax viloyati bo‘yicha boshqarmasi xodimlari tomonidan viloyat bojxona boshqarmasi bilan hamkorlikda o‘tkazilgan tezkor tadbirda, Tojikistonning So‘g‘d viloyati Panjikent tumanida yashovchi, 1970-yilda tug‘ilgan Tojikiston fuqarosi Jizzax viloyatining Baxmal tumanida yashovchi, 1983 va 1984-yillarda tug‘ilgan ikki tanishi bilan o‘zaro til biriktirib, Tojikistondan kontrabanda yo‘li bilan keltirilgan 9 kilogramm 530 gramm opiy moddasini 55 ming dollarga sotgan vaqtida ushlangan.
DXX xodimlari tomonidan viloyat IIB bilan hamkorlikda Zomin tumanida o‘tkazilgan tezkor tadbirda esa 1958, 1976 va 1985-yillarda tug‘ilgan uch nafar Tojikiston fuqarosi ushlanib, ulardan 2 kilogramm 986 gramm gashish moddasi protsessual tartibda rasmiylashtirib olingan.
Shuningdek, tezkor tadbir davom ettirilib, ularni Dashtobod shaharchasidagi umumiy ovqatlanish maskanida kutib turgan, 1979-yilda tug‘ilgan yana bir Tojikiston fuqarosi ushlangan. Aniqlanishicha, ushbu giyohvandlik vositasi ham Tojikistondan olib kelingan.
DXX Qashqadaryo viloyati bo‘yicha boshqarmasi xodimlari tomonidan viloyat bojxona va ichki ishlar boshqarmalari bilan hamkorlikda o‘tkazilgan tezkor tadbirda, Buxoro—Qashqadaryo yo‘nalishida harakatlanayotgan, Buxoro shahrida yashovchi, 1982-yilda tug‘ilgan shaxs boshqaruvidagi Matiz Muborak tumanidagi “Shirinbuloq” YPX maskanida to‘xtatilib, ko‘zdan kechirilgan.
Natijada avtomashinada u bilan birga kelayotgan hamshahari, 1998-yilda tug‘ilgan fuqaroning yonida 973 gramm geroin borligi aniqlanib, tegishli tartibda rasmiylashtirib olingan.
Dastlabki surishtiruv harakatlari davomida, Buxoro viloyatining Kogon tumanidagi dala maydoniga 1 kilogramm 968 gramm geroin ko‘mib qo‘yilgani aniqlanib, ushbu giyohvandlik vositasi ham protsessual tartibda rasmiylashtirib olingan.
Hozirda ushbu holatlar yuzasidan DXXning joylardagi tergov bo‘limlari tomonidan mazkur shaxslarga nisbatan Jinoyat kodeksining 246- va 273-moddalari bilan jinoyat ishlari qo‘zg‘atilib, qamoqqa olish tarzidagi ehtiyot chorasi qo‘llangan.
Tergov harakatlari olib borilmoqda.
Izoh (0)