Davlat xavfsizlik xizmati xodimlari tomonidan Bojxona qo‘mitasi bilan hamkorlikda o‘tkazilgan tezkor tadbirda xalqaro kuryerlik jo‘natmalari orqali xorijdan kuchli taʼsir qiluvchi moddalarni kontrabanda qilish bilan shug‘ullangan jinoiy guruh faoliyatiga chek qo‘yildi, deb xabar beradi O‘zA.
Ma’lum qilinishicha, aviajo‘natmalar orqali Xitoy davlatidan kosmetika mahsulotlari tayyorlashda ishlatiladigan vosita nomi ostida yuborilgan 5 kilogramm “Pregabalin” moddasi to‘xtatib qolingan.
Tezkor-qidiruv tadbirlari natijasida ushbu kuchli taʼsir qiluvchi modda 2000 va 2002-yillarda tug‘ilgan uch nafar O‘zbekiston fuqarosiga tegishli ekani aniqlanib, ular harakatlanayotgan, Cobalt rusumli avtotransport vositasi to‘xtatilib, ko‘zdan kechirilgan. Natijada, avtomashina salonida bo‘lgan 1500 dona “Pregabalin” va 90 dona “Tropikamid” kuchli taʼsir qiluvchi dori vositalari tegishli tartibda rasmiylashtirib olingan.
Shuningdek, Toshkent shahrining Mirzo Ulug‘bek tumanida ular ijaraga olgan xonadon ko‘zdan kechirilganda, ushbu manzilda yashirin laboratoriya tashkil etilgani va jinoiy guruh aʼzolari bo‘lgan – 2003 va 2005-yillarda tug‘ilgan ikki nafar qiz kimyoviy moddalarni aralashtirgan holda kuchli taʼsir qiluvchi dori vositalarini tayyorlash va bo‘sh kapsulalarga qadoqlash bilan shug‘ullanishi maʼlum bo‘lgan.
Mazkur xonadondan sotishga tayyorlab qo‘yilgan 376 dona “Pregabalin” kapsulasi, 101 dona flakonda “Tropikamid”, 14 kilogramm 150 gramm kuchli taʼsir qiluvchi moddalari kukuni, 9 ta polietilen qopda bo‘sh kapsula va flakonlar, 20 litr xlorid kislotasi, elektron torozi, kolba, mikser va shprislar protsessual tartibda rasmiylashtirib olingan.
Hozirda jinoiy guruhning olti nafar aʼzosiga nisbatan Jinoyat kodeksining tegishli moddalari bilan jinoyat ishi qo‘zg‘atilib, qamoq ehtiyot chorasi qo‘llanilgan.
Avgust boshlarida DXX Samarqand viloyatida giyohvand moddalar oldi-sotdisi bilan shug‘ullanib kelgan guruhni qo‘lga olgandi. O‘shanda Urgut tumanida yashovchi 1978 va 1986-yillarda tug‘ilgan opa-singil 911 gramm opiy giyohvandlik moddasini 12 ming AQSH dollariga sotgan vaqtida ushlangan. Shuningdek, Toshkentda Kia mashinasida narkokuryerlik bilan shug‘ullangan shaxs ushlangani to‘g‘risida xabar berilgandi.
Izoh (0)