Ichki ishlar vazirligi “Yo‘l harakati xavfsizligini taʼminlash sohasini yanada rivojlantirishga doir qo‘shimcha chora-tadbirlar to‘g‘risida”gi hukumat qarori loyihasini muhokamaga qo‘ydi.
Hujjat bilan tuman (shahar) hokimliklar, shu jumladan, davlat-xususiy sheriklik asosida jalb qilingan investorlar tomonidan avtomobil yo‘llarida yo‘l harakati qoidalari buzilganini qayd etuvchi maxsus avtomatlashtirilgan foto va video qayd etish dasturiy-texnik tizimlarini o‘rnatish va ekspluatatsiya qilish tartibi to‘g‘risidagi nizom tasdiqlanadi.
Qayd etilgan yo‘l harakati qoidabuzarliklaridan undirilgan jarima summasini taqsimlashning quyidagi tartibi joriy etiladi:
a) tuman (shahar) hokimliklari tomonidan o‘rnatilgan maxsus avtomatlashtirilgan foto va video qayd etish dasturiy-texnik tizimlari joriy etilib, ishga tushirilgan kundan boshlab:
- 30 foizi – bevosita tuman (shahar) mahalliy byudjetiga, mazkur mablag‘lar yo‘l harakatini raqamlashtirish, yo‘l infratuzilmasini rivojlantirishga, yo‘l-patrul xizmati xodimlarining qo‘shimcha shtatlarini kiritishga maqsadli yo‘naltiriladi;
- 50 foizi –respublika budjetiga;
- 10 foizi –Ichki ishlar vazirligining budjetdan tashqari jamg‘armasiga;
- 5 foizi –Ichki ishlar vazirligining Jamoat xavfsizligi departamenti Yo‘l harakati xavfsizligi xizmati DYHXX moddiy texnika bazasini rivojlantirish, xodimlarni rag‘batlantirish va mukofotlash jamg‘armasiga;
- 5 foizi —Davlat xavfsizligi xizmati huzuridagi “Kiberxavfsizlik markazi” davlat unitar korxonasiga.
b) davlat-xususiy sheriklik asosida jalb qilingan investorlar tomonidan o‘rnatilgan maxsus avtomatlashtirilgan foto va video qayd etish dasturiy-texnik tizimlari joriy etilib, ishga tushirilgan kundan boshlab, davlat-xususiy sheriklik to‘g‘risidagi bitimning amal qilish muddatigacha:
- 30 foizi – bevosita tuman (shahar) mahalliy budjetiga, mazkur mablag‘lar yo‘l harakatini raqamlashtirish, yo‘l infratuzilmasini rivojlantirishga, yo‘l-patrul xizmati xodimlarining qo‘shimcha shtatlarini kiritishga maqsadli yo‘naltiriladi;
- 25 foizi – davlat-xususiy sheriklik asosida jalb qilingan investorlarning hisobvarag‘iga;
- 20 foizi –respublika budjetiga;
- 10 foizi –Ichki ishlar vazirligining byudjetdan tashqari jamg‘armasiga;
- 10 foizi – Ichki ishlar vazirligining Jamoat xavfsizligi departamenti Yo‘l harakati xavfsizligi xizmati DYHXX moddiy texnika bazasini rivojlantirish, xodimlarni rag‘batlantirish va mukofotlash jamg‘armasiga;
- 5 foizi —Davlat xavfsizligi xizmati huzuridagi “Kiberxavfsizlik markazi” davlat unitar korxonasiga yo‘naltiriladi.
Bunda, Ichki ishlar vazirligining Jamoat xavfsizligi departamenti Yo‘l harakati xavfsizligi xizmati DYHXX moddiy texnika bazasini rivojlantirish, xodimlarni rag‘batlantirish va mukofotlash jamg‘armasiga yo‘naltirilgan mablag‘lar Yo‘l harakati xavfsizligi xizmati Maʼmuriy amaliyot bo‘limi xodimlarini rag‘batlantirish, mukofotlash hamda ularning moddiy-texnika bazasini rivojlantirishga maqsadli sarflanadi.
Ichki ishlar vazirligi uch oy muddatda:
- transport vositalarining harakatlanish jadalligi va oxirgi ikki yilda sodir etilgan yo‘l harakati qoidabuzarliklarining tahlili asosida yo‘l harakati qoidalari buzilishini maxsus avtomatlashtirilgan foto va video qayd etish dasturiy-texnik tizimlari o‘rnatilishi mumkin bo‘lgan joylarning dislokatsiyasini ishlab chiqadiva ushbu maʼlumotlarni muntazam ravishda yangilab borilishini hamda mazkur maʼlumotlarni har ikki chorakda tuman (shahar) hokimliklariga yuborilishi ta’minlaydi.
Eslatib o‘tamiz, 2020-yil dekabr oyida “Davlat tomonidan tartibga solinadigan sohalarga xususiy sektorni jalb etish bo‘yicha qo‘shimcha chora-tadbirlar to‘g‘risida”gi prezident qarori qabul qilingandi. Qarorga ko‘ra, maxsus avtomatlashtirilgan foto va video qayd etish dasturiy texnik vositalari o‘rnatiladigan joylarni tadbirkorlarga biriktirish elektron auksion savdolari orqali amalga oshiriladi.
Izoh (0)