“Kosmos”dan “Million” va “Dizayn”ning saviyasidagi konsertni kutish kerak emas — Davron Kabulov o‘zi prodyusserlik qilgan jamoaning raqobatchi bo‘lishidan qo‘rqadimi? (video)

“Million” kulgi jamoasi tarkibida shakllangan “Kosmos” kulgi jamoasi katta saroydagi ilk yakkaxon konsert dasturini namoyish etdi. “Daryo” muxbiri konsert dasturining sahna ortidagi qiziqarli voqealari haqida reportaj tayyorladi.

Ikki kunga mo‘ljallangan konsert tomoshabinlar bilan to‘ldi. Bu yosh jamoaning ilk konserti uchun juda zo‘r natija hisoblanadi. Jamoa yangi aʼzolar bilan boyigani ham quvonarli hol.

— “Kosmos” kulgi jamoasidan “Million” yoki “Dizayn” saviyasidagi konsert kutish kerak emas. Debyut konsertda baribir kamchiliklar bo‘ladi va ular boshqa jamoalarga nisbatan ikki hissa ko‘proq hayajonlanishadi. Ular “Million” kulgi jamoasining konsertlarida tajriba orttirishdi. Agar ularga ishonmaganimizda, yakkaxon konsertlarini o‘tkazishlariga imkoniyat yaratmagan bo‘lardik.

Ularning o‘ziga xosligi shundaki, ortiqcha balandparvozlik yo‘q, qishloq odamlari orasidagi yumorni ham chiroyli olib chiqolishadi. Bu jihatlari bilan boshqa jamoalardan ajralib turishadi, — deydi Davron Kabulov.

Davron Kabulov kun kelib “Kosmos” jamoasining “Million”ga raqobatchi bo‘lishidan qo‘rqmaydimi? Jamoa prodyusseri bu savolga quyidagicha javob berdi.

— Ularning yo‘nalishi bir-biriga o‘xshamaydi. Agar raqobatchi bo‘lgan taqdirda ham, faqat xursand bo‘laman. Chunki ota-ona farzandlarining biri ikkinchisidan o‘zib ketsa, faqat quvonadi. “Million” ham, “Kosmos” ham men uchun birdek, — deydi Davron Kabulov.

“Kosmos” kulgi jamoasining asosiy aʼzolaridan biri Shahboz Narziyev konsertoldi hayajonlanayotgani va qancha vaqt tayyorgarlik ko‘rgani haqida so‘zlab berdi.

— Rostini aytsam, hayajonim juda kuchli. Tomoshabinlar qanday qabul qilisharkan, degan savol meni o‘ylantiryapti. Konsert uchun roppa-rosa uch oy tayyorgarlik ko‘rdik. Boshqa jamoalarning konsertidan farq qiladigan jihatlar ham bor. Ilk konsert har doim imtihondek o‘tadi. Qancha tayyorgarlik ko‘rilsa ham, konsertga qanchalik tayyor ekanligimiz sahnaga chiqqanimizda maʼlum bo‘ladi, — deydi Shahboz Narziyev.

“Kosmos” jamoasini qo‘llab-quvvatlash uchun o‘zbek shou-biznesining ko‘plab vakillari va kulgi jamoalari aʼzolari ham tashrif buyurishdi. Xususan, “Dizayn” jamoasi aʼzosi Elmurod Haqnazarov yosh jamoaning konserti haqida o‘z fikrlarini aytdi.

— Bugungi dastur ilk yakkaxon konsert dasturi uchun aʼlo darajada o‘tdi. Parda yopilganidan keyin jamoa aʼzolarining yuziga qaraganda, o‘zidan ko‘ngli to‘lmagani seziladi. Ammo ukalarimiz dasturdan ko‘ngli to‘lgani sezildi. Yigitlar bilan hayotda ham yaqinmiz, ularning qanday tomoshalarga qodirligini yaxshi bilaman, — deydi Elmurod Haqnazarov.

Konsert dasturining sahna ortidagi qiziqarli jarayonlari bilan tanishishni istasangiz, reportajni quyida to‘liq holda tomosha qiling.