“Million” kulgi jamoasi a’zosi O‘tkir Shodmonov “Daryo”ning YouTube’dagi kanaliga bergan intervyusida Davron Kobulov bilan qanday tanishgani, o‘qituvchilik qilishining sabablari va unga omad keltirgan shevasi haqida so‘zlab berdi.
— Davron Kabulovni disklarda ko‘rib yurgan bola edim. “Garaj” loyihasiga kelganda u insonning oldiga borib qo‘l uzatishga ham ikkilanganman. Balki bu gapim kimlargadir erish tuyular, ammo haqiqatan ham to‘rt yil avval hayotim bunchalik o‘zgarib ketishini va katta sahnalarga chiqishimni tasavvur ham qilmagandim. “Garaj” ko‘rsatuvining ilk syomkasidan so‘ng Samarqandga borib, hammaga san’atkorlar bilan uchrashganim haqida aytib berganimda ishonishmagandi, — deydi O‘tkir Shodmonov.
Bir muddat Hamid Olimjon nomidagi musiqali teatrda xor jamoasida ishlagan O‘tkir Shodmonov ayni kunlarda musiqa maktabida o‘quvchilarga dars beradi. Uni o‘qituvchi bo‘lishga undagan jihatlar va o‘quvchilar bilan munosabatini bilishga qiziqdik.
— O‘qiganman, shu bois bu sohada ham ishlashim kerak. Avvaliga teatrning xor jamoasida ishladim. Undan keyin o‘zim o‘qigan san’at maktabiga ishga taklif etishdi. Ayni damda o‘quvchilarga dirijyorlikdan saboq beraman. Sahnada komik aktyor bo‘lganim bilan, ishimga jiddiy yondashaman. Agar o‘quvchilar dars payti “Million” yoki vaynlarim haqida so‘rashsa, jahlim chiqadi. Darsda komik aktyor emas, o‘qituvchi ekanligimni uqtiraman. Rosti pul uchun o‘qituvchilik qilayotganim yo‘q. Ishimni yaxshi ko‘raman. Konsert arafasida o‘z hisobimdan ta’til olib, Toshkentga kelaman. Yana odamlarda o‘zi Toshkentda yursa ham u yerdan oylik olaverarkan-da, degan xayol o‘tmasin, — dedi O‘tkir Shodmonov.
“Alyo, ena” deya mashhurlikka erishgan O‘tkir Shodmonov nima sababdan shevasidan voz kechmasligi haqida aytib o‘tdi.
— Ko‘pchilik tanishlarim Toshkentga kelgandan keyin o‘z shevasida gapirishni istashmaydi. Men avvaldan shevamni o‘zgartirmayman, deb o‘z-o‘zimga so‘z bergandim. Bu menga qaysidir ma’noda omad ham olib keldi. Aslida, sahnada o‘zimning boshdan kechirganlarimni ijro etaman. Toshkent vokzalidagi sarguzashtlar ham 4-5 yil avval hayotimda sodir bo‘lgan. Onam rahmatli ham obrazimda tasvirlanganidek sodda va samimiy inson edi. “Million”ning konsertida “Alyo ena” deb chiqqan sahna ko‘rinishim ko‘pchilikka ma’qul bo‘lgan. Ammo ochig‘i, bu chiqish o‘zimga umuman yoqmagan.
Konsertdan ancha o‘tib, video olsak-chi, deb o‘ylab qolganman. Qadrdon ukalarim bilan vokzalga borib, qishloqdan kelgan yigitning enasiga qo‘ng‘iroq qilishi bilan bog‘liq hazilni suratga olganmiz. Bir hafta uni ijtimoiy tarmoqqa joylashga ikkilanganman. “Odamlarga yoqmasa-chi”, degan qo‘rquv bor edi. Keyin nima bo‘lsa bo‘ldi, agar kam ko‘rilsa o‘chirib tashlayman deb Instagram sahifamga joylaganman. Obunachilarim hozirgidek ko‘p emasdi, u video ikki kunda 30 ming marta tomosha qilingan. O‘sha paytda “Million”ning konsert tayyorgarligiga borishim kerak edi. Undan chiqib videoni o‘chiraman dedim. Oradan 3-4 soat vaqt o‘tib, video 300 ming marotaba tomosha qilinibdi. Ana shundan keyin o‘zimda kuch topib, hazil videolar suratga olishni boshladim, — deydi O‘tkir Shodmonov.
Izoh (0)