“Космос”дан “Миллион” ва “Дизайн”нинг савиясидаги концертни кутиш керак эмас — Даврон Кабулов ўзи продюссерлик қилган жамоанинг рақобатчи бўлишидан қўрқадими? (видео)

“Миллион” кулги жамоаси таркибида шаклланган “Космос” кулги жамоаси катта саройдаги илк яккахон концерт дастурини намойиш этди. “Дарё” мухбири концерт дастурининг саҳна ортидаги қизиқарли воқеалари ҳақида репортаж тайёрлади.

Икки кунга мўлжалланган концерт томошабинлар билан тўлди. Бу ёш жамоанинг илк концерти учун жуда зўр натижа ҳисобланади. Жамоа янги аъзолар билан бойигани ҳам қувонарли ҳол.

— “Космос” кулги жамоасидан “Миллион” ёки “Дизайн” савиясидаги концерт кутиш керак эмас. Дебют концертда барибир камчиликлар бўлади ва улар бошқа жамоаларга нисбатан икки ҳисса кўпроқ ҳаяжонланишади. Улар “Миллион” кулги жамоасининг концертларида тажриба орттиришди. Агар уларга ишонмаганимизда, яккахон концертларини ўтказишларига имконият яратмаган бўлардик.

Уларнинг ўзига хослиги шундаки, ортиқча баландпарвозлик йўқ, қишлоқ одамлари орасидаги юморни ҳам чиройли олиб чиқолишади. Бу жиҳатлари билан бошқа жамоалардан ажралиб туришади, — дейди Даврон Кабулов.

Даврон Кабулов кун келиб “Космос” жамоасининг “Миллион”га рақобатчи бўлишидан қўрқмайдими? Жамоа продюссери бу саволга қуйидагича жавоб берди.

— Уларнинг йўналиши бир-бирига ўхшамайди. Агар рақобатчи бўлган тақдирда ҳам, фақат хурсанд бўламан. Чунки ота-она фарзандларининг бири иккинчисидан ўзиб кетса, фақат қувонади. “Миллион” ҳам, “Космос” ҳам мен учун бирдек, — дейди Даврон Кабулов.

“Космос” кулги жамоасининг асосий аъзоларидан бири Шаҳбоз Нарзиев концертолди ҳаяжонланаётгани ва қанча вақт тайёргарлик кўргани ҳақида сўзлаб берди.

— Ростини айтсам, ҳаяжоним жуда кучли. Томошабинлар қандай қабул қилишаркан, деган савол мени ўйлантиряпти. Концерт учун роппа-роса уч ой тайёргарлик кўрдик. Бошқа жамоаларнинг концертидан фарқ қиладиган жиҳатлар ҳам бор. Илк концерт ҳар доим имтиҳондек ўтади. Қанча тайёргарлик кўрилса ҳам, концертга қанчалик тайёр эканлигимиз саҳнага чиққанимизда маълум бўлади, — дейди Шаҳбоз Нарзиев.

“Космос” жамоасини қўллаб-қувватлаш учун ўзбек шоу-бизнесининг кўплаб вакиллари ва кулги жамоалари аъзолари ҳам ташриф буюришди. Хусусан, “Дизайн” жамоаси аъзоси Элмурод Ҳақназаров ёш жамоанинг концерти ҳақида ўз фикрларини айтди.

— Бугунги дастур илк яккахон концерт дастури учун аъло даражада ўтди. Парда ёпилганидан кейин жамоа аъзоларининг юзига қараганда, ўзидан кўнгли тўлмагани сезилади. Аммо укаларимиз дастурдан кўнгли тўлгани сезилди. Йигитлар билан ҳаётда ҳам яқинмиз, уларнинг қандай томошаларга қодирлигини яхши биламан, — дейди Элмурод Ҳақназаров.

Концерт дастурининг саҳна ортидаги қизиқарли жараёнлари билан танишишни истасангиз, репортажни қуйида тўлиқ ҳолда томоша қилинг.