DXX raisining “O‘zbekiston Respublikasi kiberxavfsizlik va muhim axborot infratuzilmasi obyektlarining kiberxavfsizligini taʼminlash darajasini baholash tartibi to‘g‘risidagi nizomni tasdiqlash haqida” buyrug‘i imzolandi.
Baholash kiberxavfsizlik va muhim axborot infratuzilmasi obyektlari rahbarlarining DXXga taqdim qilgan murojaatiga muvofiq o‘tkaziladi. Shuningdek, baholash bevosita vakolatli davlat organi tashabbusiga ko‘ra yoki uning topshirig‘i asosida “Kiberxavfsizlik markazi” DUK tomonidan amalga oshirilishi mumkin. Baholash muddati — 3 oygacha, ushbu muddat qo‘shimcha 3 oyga uzaytirilishi mumkin.
Baholash jarayonida kiberxavfsizlik va muhim axborot infratuzilmasi (MAI) obyektlarining kiberxavfsizligiga salbiy taʼsir etuvchi tahdidlar mavjudligi, xususan, quyidagi masalalar o‘rganiladi:
- kiberhimoyani taʼminlash tizimining samaradorligi;
- maʼlumot va uni qayta ishlovchi obyektlardan ruxsatsiz foydalanishning oldini olish choralarining joriy etilganligi;
- kiberhimoyani taʼminlash tizimi parametrlarining texnik reglamentlar talablariga muvofiqligi, kiberxavfsizlik va MAI obyektining uzluksiz faoliyat yuritishini taʼminlovchi chora-tadbirlar joriy etilganligi;
- kiberxavfsizlik hodisasi ro‘y berganda kiberhimoyani taʼminlash tizimining tezkor tiklash imkoniyati mavjudligi;
- kiberhujumlarni monitoring, audit va tahlil qilish, aniqlash, chora ko‘rish hamda asoratlarini bartaraf etish tizimining yo‘lga qo‘yilganligi;
- kiberxavfsizlik va MAI obyekti kiberxavfsizligini va uning ekspluatatsiyasini taʼminlovchi hujjatlarning mavjudligi;
- kiberxavfsizlikni taʼminlash bilan bog‘liq lavozimlarga mutaxassislarning tayinlanganligi;
- konfidensial maʼlumotlar himoyasining taʼminlanganligi.
Baholash natijalari bo‘yicha bartaraf etilishi talab etiladigan kamchiliklarni aks ettiruvchi dalolatnoma tuziladi.
Hujjat Qonun hujjatlari maʼlumotlari milliy bazasida eʼlon qilingan va 2023-yil 25-sentyabrdan kuchga kirdi.
Maʼlumot uchun, muhim axborot infratuzilmasi obyektlari — davlat boshqaruvi va davlat xizmatlari ko‘rsatish, mudofaa, davlat xavfsizligini, huquq-tartibotni taʼminlash, yoqilg‘i-energetika majmui (atom energetikasi), kimyo, neft-kimyo tarmoqlari, metallurgiya, suvdan foydalanish va suv taʼminoti, qishloq xo‘jaligi, sog‘liqni saqlash, uy-joy kommunal xizmatlar ko‘rsatish, bank-moliya tizimi, transport, axborot-kommunikatsiya texnologiyalari, ekologiya va atrof-muhitni muhofaza qilish, strategik ahamiyatga ega bo‘lgan foydali qazilmalarni qazib olish va qayta ishlash sohasida, ishlab chiqarish sohasida, shuningdek, iqtisodiyotning boshqa tarmoqlarida va ijtimoiy sohada qo‘llaniladigan axborotlashtirish tizimlari.
O‘zbekistonda kiberjinoyatchilik
Mamlakatda 2020-yilda axborot texnologiyalari sohasida 106 ta jinoyat qayd etilgan. 2021-yilda bu ko‘rsatkich 2 281 tani, 2022-yilda esa bir yil avvalgidan ikki baravar, 2 yil avvalgidan 40 baravar ko‘payib, 4 332 tani tashkil etgan. Yil davomida qayd etilgan holatlarning 3 372 tasi yoki 82 foizini bank plastik kartalardan pul mablag‘larni talon-toroj qilish bilan bog‘liq jinoyatlardir.
Izoh (0)