Toshkentda kiberxavfsizlik bo‘yicha o‘quv va ilmiy-tadqiqot markazini tashkil etiladi. Bu haqda “Dunyo” agentligi xabar berdi.
Toshkent xalqaro Vestminster universiteti rektori Bahrom Mirqosimov Malayziyaning Osiyo va Tinch okeani texnologiya va innovatsiyalar universiteti rektori Xo Chin Kuan bilan muzokara o‘tkazdi. Muzokaralar natijasida ikki universitet o‘rtasida Hamkorlik memorandumi imzolandi.
Osiyo va Tinch okeani texnologiya va innovatsiyalar universiteti (Asia Pacific University of Technology & Innovation – APU) 1993-yilda tashkil etilgan. Malayziya raqamli iqtisodiyot korporatsiyasining raqamli texnologiyalarga ixtisoslashgan yetakchi universitet maqomiga sazovor bo‘lgan. QS Rankings xalqaro reytingi bo‘yicha dunyoning yetakchi 700 universiteti ro‘yxatidan o‘rin olgan. Universitet huzurida sanoatda sunʼiy intellektni qo‘llash, robototexnika, kiberxavfsizlik, kreativ industriya, Internet of Things (IoT) texnologiyalarini rivojlantirish bo‘yicha ilmiy markazlar faoliyat yuritadi.
Toshkent xalqaro Vestminster universiteti rektori tashrif davomida, shuningdek, Taylor’s University, UOW Malaysia, INTI International University kabi yetakchi oliy taʼlim muassasalari rahbarlari bilan ham hamkorlik istiqbollarini muhokama qilgan.
O‘tkazilgan uchrashuvlar natijasida o‘qituvchilar malakasini oshirish va talabalar almashinuvini yo‘lga qo‘yish, ijodiy iqtisodiyot va kiberxavfsizlik bo‘yicha Kuala-Lumpur “Yozgi maktab” dasturlarini yo‘lga qo‘yish, Toshkentda kiberxavfsizlik bo‘yicha o‘quv va ilmiy-tadqiqot markazini tashkil qilish bo‘yicha kelishuvga erishildi.
O‘zbekistonda kiberjinoyatchilik
Mamlakatda 2020-yilda axborot texnologiyalari sohasida 106 ta jinoyat qayd etilgan. 2021-yilda bu ko‘rsatkich 2 281 tani, 2022-yilda esa bir yil avvalgidan ikki baravar, 2 yil avvalgidan 40 baravar ko‘payib, 4 332 tani tashkil etgan. Yil davomida qayd etilgan holatlarning 3 372 tasi yoki 82 foizini bank plastik kartalardan pul mablag‘larni talon-toroj qilish bilan bog‘liq jinoyatlardir.
Izoh (0)