Dunyoda miqyosida 2022-yilda kiberjinoyatlardan ko‘rilgan zarar 6 trillion dollarni tashkil etgan bo‘lsa, bu raqam 2025-yilga borib 10,5 trillion dollarga yetishi taxmin qilinmoqda. Bu haqda 25—26-sentyabr kunlari Toshkent shahrida bo‘lib o‘tgan BMTning Terrorizmga qarshi kurash boshqarmasining kiberxavfsizlik va yangi texnologiyalar bo‘yicha global dasturi doirasidagi mintaqaviy seminarda maʼlum qilindi.
Seminar “Inson huquqlariga rioya qilgan holda terrorizmga qarshi kurashda yangi texnologiyalardan foydalanish bo‘yicha milliy aksilterror chora-tadbirlarini ishlab chiqish” mavzusida bo‘lib o‘tdi.
Unda terrorizmga qarshi kurashish sohasida faoliyat yuritadigan 50 dan ortiq milliy vakillar – hukumat va qonun chiqaruvchi tuzilmalar, terrorizmga qarshi kurash idoralari, huquqni muhofaza qiluvchi idoralar va jinoyat adliya idoralari vakillari – Markaziy Osiyo davlatlari va Mo‘g‘ulistondan shuningdek, fuqarolik jamiyati, xususiy sektor va taʼlim muassasalari vakillari ishtirok etdi.
Taʼkidlanishicha, ayni paytda, BMT Global aksilterror strategiyasida yangi texnologiyalardan terrorchilik maqsadlarida foydalanish ehtimoli haqida xavotirlar qayd etilgan. Shu munosabat bilan BMTga aʼzo davlatlarga ushbu muammolarga javob berish uchun qo‘shimcha chora-tadbirlarni ko‘rib chiqishga chaqiradi.
Seminarning tashkil etilishi mintaqa davlatlarining manfaatlariga to‘la javob beradi va ularning ixtisoslashgan yo‘nalishlarda hamkorlikka tayyorligini ko‘rsatmoqda.
Xususan, seminarning asosiy maqsadlari quyidagilardan iborat:
- bilimlarni rivojlantirish va terrorizmga qarshi kurashda yangi texnologiyalar bilan bog‘liq muammolar va imkoniyatlar haqida xabardorlikni oshirish;
- yangi texnologiyalarning muammolari, uning imkoniyatlariga yetarlicha javob beradigan terrorizimga qarshi kurash siyosatining samarali choralarini ishlab chiqish va amalga oshirish uchun zarur bo‘lgan ko‘nikmalar hamda imkoniyatlarni oshirish;
- huquqni muhofaza qilish organlarining terrorchilar tomonidan raqamli texnologiyalardan foydalanishiga qarshi kurashish va tergov qilish salohiyatini kuchaytirish.
Tadbir O‘zbekiston Davlat xavfsizlik xizmati, O‘zbekiston Prezidenti huzuridagi Strategik va mintaqalararo tadqiqotlar instituti, Ichki ishlar vazirligi akademiyasi, shuningdek, BMTning Terrorizmga qarshi kurash boshqarmasi ( CTD) va BMTning Markaziy Osiyo uchun Preventiv diplomatiya bo‘yicha mintaqaviy markazi (UNRCCA) hamkorligida tashkil etildi.
Izoh (0)