BMTning Oziq-ovqat va qishloq xo‘jaligi tashkiloti (FAO) O‘zbekistonda chigirtkaga qarshi kurashishni yanada yaxshilash uchun Qishloq xo‘jaligi vazirligi huzuridagi O‘simliklar karantini va himoyasi agentligiga 8 ta maxsus jihozlangan Toyota Hilux avtomobilini topshirdi. Bu haqda vazirlik matbuot xizmati xabar berdi.

Shu munosabat bilan bo‘lib o‘tgan tadbirda ta’kidlanishicha, Markaziy Osiyo qishloq xo‘jaligi uchun chigirtkalar  jiddiy xavf tug‘dirayotganini ko‘pchilik ham bilmaydi.

“Holbuki, ekinlarni yo‘q qilish orqali zararkunandalar hosil miqdori va sifatini pasaytirishi, aholini oziq-ovqat bilan ta’minlashni xavf ostida qoldirishi aniq”, — deyiladi xabarda.

Bundan tashqari, chigirtkalar bosqini qishloq xo‘jaligiga bevosita bog‘liq bo‘lgan fermerlarning daromadlariga salbiy ta’sir ko‘rsatadi. Shu bois ushbu zararkunandalarga qarshi kurashish O‘simliklar karantini va himoyasi  agentligining muhim vazifalaridan biri hisoblanadi.

Mazkur ko‘mak FAOning “Markaziy Osiyoda chigirtkalarga qarshi kurashishni takomillashtirish (II bosqich)” mintaqaviy loyihasi doirasida amalga oshirilgan.

Iyul oyida Qozog‘istonning qator viloyatlarida zararli chigirtkalar hujumiga duch kelgani to‘g‘risida xabar berilgandi. O‘zbekiston O‘simliklar karantini va himoyasi agentligi axborot xizmati rahbari Sabina Sadinova bu kabi holat O‘zbekistonda ham kuzatilishi mumkinmi degan savolga javob bergan.