Дунёда миқёсида 2022 йилда кибержиноятлардан кўрилган зарар 6 триллион долларни ташкил этган бўлса, бу рақам 2025 йилга бориб 10,5 триллион долларга етиши тахмин қилинмоқда. Бу ҳақда 25—26-сентябр кунлари Тошкент шаҳрида бўлиб ўтган БМТнинг Терроризмга қарши кураш бошқармасининг киберхавфсизлик ва янги технологиялар бўйича глобал дастури доирасидаги минтақавий семинарда маълум қилинди.
Семинар “Инсон ҳуқуқларига риоя қилган ҳолда терроризмга қарши курашда янги технологиялардан фойдаланиш бўйича миллий аксилтеррор чора-тадбирларини ишлаб чиқиш” мавзусида бўлиб ўтди.
Унда терроризмга қарши курашиш соҳасида фаолият юритадиган 50 дан ортиқ миллий вакиллар – ҳукумат ва қонун чиқарувчи тузилмалар, терроризмга қарши кураш идоралари, ҳуқуқни муҳофаза қилувчи идоралар ва жиноят адлия идоралари вакиллари – Марказий Осиё давлатлари ва Мўғулистондан шунингдек, фуқаролик жамияти, хусусий сектор ва таълим муассасалари вакиллари иштирок этди.
Таъкидланишича, айни пайтда, БМТ Глобал аксилтеррор стратегиясида янги технологиялардан террорчилик мақсадларида фойдаланиш эҳтимоли ҳақида хавотирлар қайд этилган. Шу муносабат билан БМТга аъзо давлатларга ушбу муаммоларга жавоб бериш учун қўшимча чора-тадбирларни кўриб чиқишга чақиради.
Семинарнинг ташкил этилиши минтақа давлатларининг манфаатларига тўла жавоб беради ва уларнинг ихтисослашган йўналишларда ҳамкорликка тайёрлигини кўрсатмоқда.
Хусусан, семинарнинг асосий мақсадлари қуйидагилардан иборат:
- билимларни ривожлантириш ва терроризмга қарши курашда янги технологиялар билан боғлиқ муаммолар ва имкониятлар ҳақида хабардорликни ошириш;
- янги технологияларнинг муаммолари, унинг имкониятларига етарлича жавоб берадиган терроризимга қарши кураш сиёсатининг самарали чораларини ишлаб чиқиш ва амалга ошириш учун зарур бўлган кўникмалар ҳамда имкониятларни ошириш;
- ҳуқуқни муҳофаза қилиш органларининг террорчилар томонидан рақамли технологиялардан фойдаланишига қарши курашиш ва тергов қилиш салоҳиятини кучайтириш.
Тадбир Ўзбекистон Давлат хавфсизлик хизмати, Ўзбекистон Президенти ҳузуридаги Стратегик ва минтақалараро тадқиқотлар институти, Ички ишлар вазирлиги академияси, шунингдек, БМТнинг Терроризмга қарши кураш бошқармаси ( CТD) ва БМТнинг Марказий Осиё учун Превентив дипломатия бўйича минтақавий маркази (UNRCCА) ҳамкорлигида ташкил этилди.