“O‘zbekiston Respublikasining muhim axborot infratuzilmasi obyektlari kiberxavfsizligini taʼminlash tizimini takomillashtirish bo‘yicha qo‘shimcha chora-tadbirlar to‘g‘risida”gi prezident qarori qabul qilindi, deb xabar beradi Norma.
Endilikda kiberxavfsizlikka maʼsul bo‘lgan xodimlarni lavozimga tayinlash va ozod etish haqida maʼlumot DXXga taqdim etiladi. Shuningdek, ushbu xodimlar har 3 yilda DXX tomonidan attestatsiyadan o‘tkaziladi.
Maʼlumot uchun, muhim axborot infratuzilmasi – muhim strategik va ijtimoiy-iqtisodiy ahamiyatga ega bo‘lgan avtomatlashtirilgan boshqaruv tizimlarining, axborot tizimlari va tarmoqlar va texnologik jarayonlar resurslarining majmui.
Hujjat bilan muhim axborot infratuzilmasi (MAI) obyektlari kiberxavfsizligini taʼminlash tartibi to‘g‘risidagi nizom tasdiqlanmoqda. Unga ko‘ra quyidagilar kiberxavfsizlik tizimining asosiy vazifalari hisoblanadi:
- MAI obyektlarida qayta ishlanadigan maʼlumotdan noqonuniy foydalanish, uni o‘chirib tashlash, o‘zgartirish, bloklar (cheklash), nusxa olish, taqdim qilish, tarqatish va shu kabi kiberxavfsizlikka tahdid soluvchi boshqa noqonuniy xatti-harakatlarning oldini olish;
- maʼlumotni qayta ishlashning apparat, dasturiy va apparat-dasturiy vositalariga MAI obyektlari ishining buzilishi va (yoki) to‘xtab qolishiga olib kelishi mumkin bo‘lgan taʼsirga yo‘l qo‘ymaslik;
- MAI obyektlari faoliyatini telekommunikatsiya tarmoqlari, axborot resurslari va hayot faoliyati tizimini zaxiralash orqali tiklash.
Qarorda, shuningdek, MAI obyektlarida kiberxavfsizlikning umumiy talablari keltirilgan.
Hujjat Qonunchilik maʼlumotlari milliy bazasida eʼlon qilingan va 2023-yil 2-iyundan kuchga kirgan.
O‘zbekistonda kiberjinoyatchilik
Mamlakatda 2020-yilda axborot texnologiyalari sohasida 106 ta jinoyat qayd etilgan. 2021-yilda bu ko‘rsatkich 2 281 tani, 2022-yilda esa bir yil avvalgidan ikki baravar, 2 yil avvalgidan 40 baravar ko‘payib, 4 332 tani tashkil etgan. Yil davomida qayd etilgan holatlarning 3 372 tasi yoki 82 foizini bank plastik kartalardan pul mablag‘larni talon-toroj qilish bilan bog‘liq jinoyatlardir.