Akademik, adabiyotshunos olim Naim Karimov 17-sentabr kuni vafot etgani xabar qilingan edi. Shavkat Mirziyoyev marhumning vafoti yuzasidan ta’ziya bildirdi.
O‘zbekiston ilm-fani va adabiyoti og‘ir judolikka uchradi.
Filologiya fani sohasida atoqli olim, O‘zbekiston Fanlar akademiyasining akademigi Naim Karimov shu yil 17-sentabr kuni 91 yoshida vafot etdi.
N.Karimov 1932-yil 12-dekabrda Toshkent shahrida tug‘ildi. 1955-yilda O‘rta Osiyo davlat universiteti (hozirgi Mirzo Ulug‘bek nomidagi O‘zbekiston Milliy universiteti)ni tamomlab, ushbu oliy ta’lim muassasasining aspiranturasida tahsil oldi.
O‘z mehnat faoliyatini 1958-yilda O‘zbekiston Fanlar akademiyasi Til va adabiyot instituti (hozirgi O‘zbek tili, adabiyoti va folklori instituti)da kichik ilmiy xodim sifatida boshlagan zahmatkash va fidoyi olim ko‘p yillik ilmiy-ijodiy faoliyati davomida mazkur institutda katta va yetakchi ilmiy xodim, bo‘lim mudiri vazifalarida ishladi. 1962-yilda nomzodlik, 1993-yilda doktorlik dissertatsiyasini himoya qildi. 2002 – 2008-yillarda “Shahidlar xotirasi” xayriya jamg‘armasi raisi hamda “Qatag‘on qurbonlari xotirasi” muzeyi rahbari, 2008-yildan ushbu muzeyning yetakchi ilmiy xodimi sifatida samarali mehnat qilib, mamlakatimizda ilm-fan va ta’lim sohalarini rivojlantirish, yuqori malakali ilmiy-pedagog kadrlar tayyorlashga salmoqli hissa qo‘shdi.
N.Karimov XX asr o‘zbek adabiyotini o‘rganish bo‘yicha keng qamrovli fundamental tadqiqot va izlanishlar olib borib, ushbu yo‘nalishda o‘ziga xos maktab yaratdi. Xususan, ma’rifatparvar jadidlarning hayoti va faoliyati, XX asr o‘zbek adabiyotining atoqli namoyandalari ijodiga bag‘ishlangan ko‘plab monografiya va tadqiqotlari, ma’rifiy romanlari hamda mingdan ortiq ilmiy maqolalari, qator darslik va o‘quv qo‘llanmalari adabiyotshunoslik faniga munosib hissa bo‘lib qo‘shildi.
Ilm-fan sohasidagi ko‘p yillik samarali xizmatlari uchun 2017-yilda O‘zbekiston Respublikasi Fanlar akademiyasining haqiqiy a’zosi etib saylandi.
Olimning mustabid tuzum yillarida qatag‘on etilgan fidoyi ziyolilarimizning ibratli hayoti va faoliyatini har tomonlama o‘rganish, ularning ilmiy-ma’rifiy merosini ommalashtirish borasidagi xizmatlari nafaqat yurtimizda, balki xorijiy mamlakatlar ilmiy jamoatchiligi tomonidan ham e’tirof etilgan.
Serqirra olim jahon adabiyotining bir qator sara asarlarini o‘zbek tiliga mahorat bilan tarjima qilish barobarida, tarixiy mavzularda yigirmaga yaqin hujjatli filmlarni yaratishda ham faol ishtirok etdi.
Uning bevosita rahbarligida ko‘plab fan nomzodlari va doktorlari tayyorlangan.
Akademik N.Karimovning mamlakatimiz ilm-fanini rivojlantirish borasidagi xizmatlari davlatimiz tomonidan munosib taqdirlandi. U “O‘zbekiston Respublikasi fan arbobi”, “O‘zbekiston Respublikasida xizmat ko‘rsatgan yoshlar murabbiysi” faxriy unvonlari, “El-yurt hurmati” ordeni hamda O‘zbekiston Respublikasining Davlat mukofotlariga sazovor bo‘lgan edi.
Atoqli olim, mehribon ustoz, samimiy va kamtarin inson Naim Karimovning xotirasi qalblarimizda hamisha saqlanib qoladi.
Sh.Mirziyoyev, T.Norboyeva, N.Ismoilov, A.Aripov,
B.Yo‘ldoshev, S.Sayidov
Izoh (0)