Buyuk Ipak yo‘li Zarafshon—Qoraqum yo‘lagi YUNESKOning Umumjahon merosi ro‘yxatiga kiritildi. Bu haqda 17-sentabr kuni YUNESKOning Qozog‘istondagi vakolatxonasi xabar berdi.
“Ipak yo‘li: Zarafshon—Qoraqum yo‘lagi” transmilliy nominatsiyasi O‘zbekiston boshchiligida Tojikiston va Turkmaniston ishtirokida ishlab chiqilgan bo‘lib, uch davlat hududida joylashgan 31 madaniy meros va arxitektura yodgorliklarini qamrab olgan.
O‘zbekistonda bu quyidagi obyektlar:
- Samarqand viloyati: Kofir qal’a, Dabusiya qadimiy shahri, Jartepa, Sulaymontepa.
- Navoiy viloyati: Raboti Malik (karvon saroy, sardoba), Mir Said Bahrom maqbarasi, Qosim Shayx majmuasi, Deggaroniy masjidi.
- Buxoro viloyati: Varaxsha yodgorligi, Vardanze yodgorligi, Vobkent minorasi, Chashmai Ayub majmuasi, Chor Bakr majmuasi, Bahouddin Naqshbandiy majmuasi, Poykent qadimiy shahri.
Ushbu obyektlarni YUNESKOning Umumjahon merosi ro‘yxatiga kiritish 2021—2030-yillarda O‘zbekiston tomonidan YUNESKOning Umumjahon madaniy merosi ro‘yxati, Insoniyat nomoddiy madaniy merosining reprezentativ ro‘yxati, Jahon xotirasi ro‘yxatiga madaniy va tabiiy meroslarni kiritishga ilgari surish bo‘yicha milliy rejada ko‘zda tutilgandi.
2023-yilning aprelida Parij shahrida YUNЕSKO bosh qarorgohida ushbu xalqaro tashkilotning “Ipak yo‘li” dasturiga asos solinganiga 35 yil to‘lgani munosabati bilan qator ilmiy, madaniy va boshqa yo‘nalishlardagi tadbirlar uyushtirilgandi. O‘shanda YUNЕSKO Umumjahon merosi markazi direktori Lazar Elondou “Ipak yo‘li: Zarafshon—Qoraqum yo‘lagi” transmilliy nominatsiyasiga yuksak baho bergan, 10—25-sentabr kunlari Saudiya Arabistonining Ar-Riyoz shahrida bo‘ladigan Umumjahon merosi qo‘mitasining 45-yig‘ilishida Umumjahon merosi ro‘yxatiga kiritilishiga umid bildirgandi.
“Ipak yo‘li: Zarafshon—Qoraqum yo‘lagi” fayli ustida 2003-yildan beri ish olib borilgan.
Izoh (0)