Toshkent viloyatining Chirchiq shahri hokimi Davron Hidoyatov Tatariston prezidenti Rustam Minnixanov bilan uchrashdi. Bu haqda “Daryo”ga Chirchiq shahri hokimligi axborot xizmati rahbari Xushbaxt Yo‘ldoshvoyev xabar berdi.
Ma’lum qilinishicha, Rustam Minnixonov va Davron Hidoyatovlar Tatariston —O‘zbekiston munosabatlari doirasidagi hamkorlikni mustahkamlash, sanoat kooperatsiyasini rivojlantirish, shuningdek, kelgusida qo‘shma loyihalarni amalga oshirish istiqbollarini muhokama qilgan.
Davron Hidoyatov Tataristonga tashrifi davomida Kazan shahridagi “KER-Xolding” AJ korxonasiga ham borgan. Va korxona bosh direktori bilan uchrashuv o‘tkazgan.
Uchrashuv davomida tomonlar Chirchiq shahrida “KER Xolding” tomonidan investitsiya loyihasini amalga oshirish bo‘yicha muzokaralar olib borib, ikkita kelishuvga erishishdi. Kelishuvlarga asosan “KER Xolding” tomonidan shaharda dvigatel, gazoturbina va kompressorlarni qayta ta’mirlash hamda O‘rta Osiyoda neft va kimyo yo‘nalishida ishlatiladigan dvigatel, kompressor va turbinalarga xizmat ko‘rsatish uchun servis markazini tashkil etish bo‘yicha kelishuv bitimi imzolandi, — deydi Xushbaxt Yo‘ldoshvoyev.
Qo‘shimcha qilinishicha, bitimga asosan qurilish ishlari joriy yilning oktabr oyida boshlanib, loyiha 2024-yil yanvar oyida ishga tushiriladi.
Shuningdek, “KER Xolding” tomonidan namuna loyiha sifatida shaharning barcha qozonxonalarni modernizatsiya qilish hamda issiqlik tizimini to‘liq boshqaruviga olish va tizimda ortiqcha issiqlikdan foydalanib koogeneratsiya stansiyasini qurish uchun 12 million dollar investitsiya kiritiladi. Loyiha bo‘yicha TIA tayyorlanib, tez kunlarda bitim imzolanishi rejalashtirilmoqda. Muzokaralar yakuni bo‘yicha Anglashuv memorandumi imzolandi, — deydi mas’ul.
Izoh (0)