Zarafshon milliy tabiat bog‘ida o‘simlik dunyosi nobud qilinib, noqonuniy ravishda qurilish olib borilgani aniqlangandi. Samarqand viloyati prokuraturasi bergan ma’lumotga ko‘ra, o‘zboshimchalik bilan qurilgan ushbu binolar javobgarlar hisobidan buzdiriladigan bo‘ldi.
Bosh prokuror o‘rinbosari boshchiligidagi ishchi guruh tomonidan o‘rganish o‘tkazilganda muhofaza etiladigan tabiiy hududlarning yer uchastkalari faqatgina xususiy buyurtma qo‘riqxonalar hamda tabiiy pitomniklar tashkil etish uchun yuridik va jismoniy shaxslarga ijaraga berilishi mumkinligi belgilanganiga qaramasdan, milliy tabiat bog‘i mansabdor shaxslari tomonidan 2021—2022-yillarda bog‘ hududidan 39,8 gektar yer maydonlari 57 nafar jismoniy va yuridik shaxslarga ijara bitimi va shartnomalarga asosan dam olish maskani qurish uchun ajratib berilgani aniqlangandi.
Bundan tashqari, ijara bitimi va shartnomalarda 57 nafar jismoniy va yuridik shaxslarga milliy tabiat bog‘idan 33,3 gektar yer maydoni ijaraga berilishi ko‘rsatilgan bo‘lsa-da, milliy tabiat bog‘i mansabdorlari mansabga sovuqqonlik bilan qarab, jami 39,8 gektar yoki shartnomada belgilangandan 6,5 gektardan ortiq yerni noqonuniy ajratib bergan.
Bog‘ mansabdorlari o‘z vazifalariga loqaydlik bilan munosabatda bo‘lishi oqibatida, 2023-yil 1-avgust holatiga ko‘ra 72 nafar ijarachidan jami 972 million 155 ming so‘m ijara pullarini undirish choralari ko‘rilmagan.
Zarafshon milliy tabiat bog‘i bilan 72 nafar jismoniy va yuridik shaxslar o‘rtasida tuzilgan ijara bitimi va shartnomalarda ijarachilarga 37 milliard 611 million so‘m investitsiya kiritish majburiyati yuklatilgan bo‘lsa-da, milliy tabiat bog‘i mansabdor shaxslari tomonidan majburiyatlarning bajarilishi nazorat qilinmagani natijasida investitsiyalar kiritilishi ta’minlanmagan.
O‘tkazilgan o‘rganishda dam olish maskani yaratish maqsadida 49 yil muddatga ijaraga olingan 18,93 gektar yer maydonlarida 22 nafar fuqaro va ikki yuridik shaxs tomonidan imorat qurish uchun zarur ruxsatnoma olmasdan og‘ir konstruksiyali bino-inshootlar qurilgani aniqlanib, ogohlantirilishiga qaramasdan ixtiyoriy buzmagani sababli inshootlarning barchasini buzish yuzasidan sudlarga da’vo arizalari kiritilgan.
Da’vo arizalar sudlar tomonidan ko‘rib chiqilib, 18 nafar fuqaro va bitta yuridik shaxsga nisbatan o‘zboshimchalik bilan qurilgan murakkab konstruksiyali binolarni javobgarlarning hisobidan buzdirish haqida hal qiluv qarorlari chiqarilgan va 2 ta noqonuniy qurilish buzib tashlangan.
Izoh (0)