“U hazillashyapti, hoynahoy” — parlament spikeri o‘rinbosari rossiyalik deputatning sobiq ittifoq davlatlari haqidagi so‘zlariga munosabat bildirdi

Oliy Majlis Qonunchilik palatasi Spikeri o‘rinbosari Odiljon Tojiyev o‘zining Telegram’dagi kanalida Rossiya Federatsiyasi davlat Dumasi deputati Yevgeniy Fyodorovning fikrlariga munosabat bildirdi.

Deputat sobiq sovet respublikalarini “bahsli hududlar”, deb atab, ushbu respublikalarning har biri SSSRdan “noqonuniy ravishda ajralib chiqqan”ini, shu sababli ertami-kechmi, ular Rossiya bilan konfliktga borishi yoki urishishini aytib o‘tgandi.

“Rossiya Federatsiyasi davlat Dumasi deputati Yevgeniy Fyodorovning shu kunlarda bergan bayonotlarini ‘g‘oyat original’ desak bo‘ladi. 

Xalq vakili o‘zini geosiyosatning yetuk mutaxassisi sifatida ko‘rsatib, har xil, hech kimga noma’lum ‘nazariyalar’ni keltiribdi. 

Uning aytishicha, Sovet Ittifoqini barcha respublikalar noqonuniy tark etgan, allaqanday 14/09-sonli qonunni buzgan holda. Aftidan, Fyodorov konstitutsiya barcha qonunlardan ustun ekanligini tushunmaydi. Modomiki, SSSR konstitutsiyasining 72-moddasida shunday deyilgan edi: Har bir Ittifoq respublikasi SSSRdan erkin chiqish huquqini saqlab qoladi.

Ustiga ustak, Fyodorovning mantig‘iga amal qilinadigan bo‘lsa, o‘tgan shu 32 yil davomida Rossiya Federatsiyasi nomidan ish tutgan prezidentlar Yelsin va Putin, Rossiya parlamenti va hukumati, Rossiya davlat hokimiyatining barcha institutlari bu respublikalar bilan noqonuniy munosabatlarda bo‘lishgan.

Ya’ni, ikki tomonlama (suveren tenglik asosidagi siyosiy-diplomatik, iqtisodiy, harbiy, madaniy va boshqa sohalardagi) aloqalarning barchasi hamda ko‘p tomonlama formatlar, bitimlar, shartnomalar (MDHdan boshlab turli xil Shanxay shartnomalarigacha) noqonuniy edi. Bu holda, butun dunyoga ishonch bilan e’lon qilish mumkinki, bunday noqonuniy huquqiy makonda ishlaydigan Rossiya hokimiyat institutlari o‘z mohiyatiga ko‘ra noqonuniy hisoblanadi.

Shunday qilib, hurmatli deputat bilvosita, ammo nozik tarzda Rossiya davlatidagi barcha davlat hokimiyati institutlarini noqonuniy munosabatlari uchun tarqatib yuborishga chaqirdimi?

U hazillashyapti, hoynahoy”, — deb yozdi Odiljon Tojiyev.