Зарафшон миллий табиат боғида ўсимлик дунёси нобуд қилиниб, ноқонуний равишда қурилиш олиб борилгани аниқланганди. Самарқанд вилояти прокуратураси берган маълумотга кўра, ўзбошимчалик билан қурилган ушбу бинолар жавобгарлар ҳисобидан буздириладиган бўлди.
Бош прокурор ўринбосари бошчилигидаги ишчи гуруҳ томонидан ўрганиш ўтказилганда муҳофаза этиладиган табиий ҳудудларнинг ер участкалари фақатгина хусусий буюртма қўриқхоналар ҳамда табиий питомниклар ташкил этиш учун юридик ва жисмоний шахсларга ижарага берилиши мумкинлиги белгиланганига қарамасдан, миллий табиат боғи мансабдор шахслари томонидан 2021—2022 йилларда боғ ҳудудидан 39,8 гектар ер майдонлари 57 нафар жисмоний ва юридик шахсларга ижара битими ва шартномаларга асосан дам олиш маскани қуриш учун ажратиб берилгани аниқланганди.
Бундан ташқари, ижара битими ва шартномаларда 57 нафар жисмоний ва юридик шахсларга миллий табиат боғидан 33,3 гектар ер майдони ижарага берилиши кўрсатилган бўлса-да, миллий табиат боғи мансабдорлари мансабга совуққонлик билан қараб, жами 39,8 гектар ёки шартномада белгилангандан 6,5 гектардан ортиқ ерни ноқонуний ажратиб берган.
Боғ мансабдорлари ўз вазифаларига лоқайдлик билан муносабатда бўлиши оқибатида, 2023 йил 1 август ҳолатига кўра 72 нафар ижарачидан жами 972 миллион 155 минг сўм ижара пулларини ундириш чоралари кўрилмаган.
Зарафшон миллий табиат боғи билан 72 нафар жисмоний ва юридик шахслар ўртасида тузилган ижара битими ва шартномаларда ижарачиларга 37 миллиард 611 миллион сўм инвестиция киритиш мажбурияти юклатилган бўлса-да, миллий табиат боғи мансабдор шахслари томонидан мажбуриятларнинг бажарилиши назорат қилинмагани натижасида инвестициялар киритилиши таъминланмаган.
Ўтказилган ўрганишда дам олиш маскани яратиш мақсадида 49 йил муддатга ижарага олинган 18,93 гектар ер майдонларида 22 нафар фуқаро ва икки юридик шахс томонидан иморат қуриш учун зарур рухсатнома олмасдан оғир конструкцияли бино-иншоотлар қурилгани аниқланиб, огоҳлантирилишига қарамасдан ихтиёрий бузмагани сабабли иншоотларнинг барчасини бузиш юзасидан судларга даъво аризалари киритилган.
Даъво аризалар судлар томонидан кўриб чиқилиб, 18 нафар фуқаро ва битта юридик шахсга нисбатан ўзбошимчалик билан қурилган мураккаб конструкцияли биноларни жавобгарларнинг ҳисобидан буздириш ҳақида ҳал қилув қарорлари чиқарилган ва 2 та ноқонуний қурилиш бузиб ташланган.
Изоҳ (0)