Farg‘ona shahridagi Islom Karimov nomidagi viloyat teatr-konsert saroyining ochiq maydonida O‘zbekiston Respublikasi davlat mustaqilligining 32 yilligiga bag‘ishlangan bayram tadbiri bo‘lib o‘tdi. Mazkur tantanali marosimda ishtirok etgan “Daryo” muxbirlari tadbirning e’tiborga molik lahzalarini suratga oldi.
Tantanali tadbir avvalida O‘zbekiston mustaqilligining o‘ttiz ikki yilligi munosabati bilan faxriy unvon, orden va medallar bilan taqdirlangan 32 nafar farg‘onaliklarga davlatning yuksak mukofotlari topshirildi.
“Yangi hayot uchun, yangi O‘zbekiston uchun” shiori ostida o‘tkazilgan badiiy-musiqiy, teatrlashtirilgan bayram tadbirida viloyatning barcha tuman va shaharlaridan taklif etilgan davlat, jamoat tashkilotlari, ta’lim muassasalari vakillari, mehnat faxriylari, harbiylar, faol yoshlar ishtirok etdi.
Viloyat hokimi Xayrullo Bozorov tantana qatnashchilarini va ularning timsolida barcha farg‘onaliklarni mamlakat mustaqilligining o‘ttiz ikki yilligi bilan qutladi.
Xayrullo Bozorov viloyatda qurilish, bunyodkorlik, sanoat, qishloq xo‘jaligi, iqtisodiy-ijtimoiy sohalarda erishilayotgan yutuqlarni alohida iftixor bilan qayd etdi.
Xususan, 2023-yilda viloyatda mahallalar infratuzilmasini rivojlantirish uchun barcha dasturlar doirasida 2,9 trillion so‘mdan ziyod mablag‘ ajratilgani, buning natijasida 1 ming 529 km ichimlik suvi, 774 km elektr, qariyb 14 km tabiiy gaz tarmoqlari tortilgani, 2 ming 352 km ichki yo‘llar asfaltlangani va bu orqali aholi yashash sharoitlari yaxshilanayotgani, viloyatning eng chekka qishloqlariga qadar zamonaviy infratuzilma kirib borayotgani ta’kidlandi.
Bayram tantanalari estrada xonandalari, taniqli san’atkorlar badiiy jamoalar hamda milliy madaniy markazlar ijodkorlari tomonidan namoyish etilgan konsert dasturi va teatrlashtirilgan tomoshalar bilan davom etdi.
Sportchilar, quvnoq bolajonlar, harbiy xizmatchilarining ko‘rgazmali chiqishlari va bayram mushakbozligi barchaga o‘zgacha zavq bag‘ishladi.
Izoh (0)