Фарғона шаҳридаги Ислом Каримов номидаги вилоят театр-концерт саройининг очиқ майдонида Ўзбекистон Республикаси давлат мустақиллигининг 32 йиллигига бағишланган байрам тадбири бўлиб ўтди. Мазкур тантанали маросимда иштирок этган “Дарё” мухбирлари тадбирнинг эътиборга молик лаҳзаларини суратга олди.
Тантанали тадбир аввалида Ўзбекистон мустақиллигининг ўттиз икки йиллиги муносабати билан фахрий унвон, орден ва медаллар билан тақдирланган 32 нафар фарғоналикларга давлатнинг юксак мукофотлари топширилди.
“Янги ҳаёт учун, янги Ўзбекистон учун” шиори остида ўтказилган бадиий-мусиқий, театрлаштирилган байрам тадбирида вилоятнинг барча туман ва шаҳарларидан таклиф этилган давлат, жамоат ташкилотлари, таълим муассасалари вакиллари, меҳнат фахрийлари, ҳарбийлар, фаол ёшлар иштирок этди.
Вилоят ҳокими Хайрулло Бозоров тантана қатнашчиларини ва уларнинг тимсолида барча фарғоналикларни мамлакат мустақиллигининг ўттиз икки йиллиги билан қутлади.
Хайрулло Бозоров вилоятда қурилиш, бунёдкорлик, саноат, қишлоқ хўжалиги, иқтисодий-ижтимоий соҳаларда эришилаётган ютуқларни алоҳида ифтихор билан қайд этди.
Хусусан, 2023 йилда вилоятда маҳаллалар инфратузилмасини ривожлантириш учун барча дастурлар доирасида 2,9 триллион сўмдан зиёд маблағ ажратилгани, бунинг натижасида 1 минг 529 км ичимлик суви, 774 км электр, қарийб 14 км табиий газ тармоқлари тортилгани, 2 минг 352 км ички йўллар асфалтлангани ва бу орқали аҳоли яшаш шароитлари яхшиланаётгани, вилоятнинг энг чекка қишлоқларига қадар замонавий инфратузилма кириб бораётгани таъкидланди.
Байрам тантаналари эстрада хонандалари, таниқли санъаткорлар бадиий жамоалар ҳамда миллий маданий марказлар ижодкорлари томонидан намойиш этилган концерт дастури ва театрлаштирилган томошалар билан давом этди.
Спортчилар, қувноқ болажонлар, ҳарбий хизматчиларининг кўргазмали чиқишлари ва байрам мушакбозлиги барчага ўзгача завқ бағишлади.
Изоҳ (0)