Rossiya TIVning rasmiy vakili Mariya Zaxarova O‘zbekiston 26-avgust kuni Rossiyaning Belgorod viloyati Shebekinskiy tumani aholisiga 12 tonna insonparvarlik yordami yuborganini ma’lum qildi.
Qayd etilishicha, yukda bolalar va kattalar kiyim-kechaklari va poyabzallari, dori-darmonlar, shuningdek, birinchi sinf o‘quvchilari uchun maktab to‘plamlari mavjud. Insonparvarlik yordami O‘zbekistonning davlat, jamoat va nodavlat tashkilotlari orqali amalga oshirilgan.
“Rossiya tomoni O‘zbekiston rahbariyati va uning fuqarolariga ikki mamlakat o‘rtasidagi mustahkam do‘stlik anʼanalariga, har tomonlama strategik sheriklikka asoslangan munosabatlarning yuksak darajasini aks ettiruvchi ushbu xayrixohlik uchun chuqur minnatdorlik bildiradi”, — deyiladi xabarda.
Belgorod viloyati va boshqa chegaradosh hududlar Rossiyaning Ukrainaga keng ko‘lamli bosqinidan so‘ng muntazam ravishda o‘qqa tutilmoqda. Ukrainaning qarshi hujumi boshlanishidan oldin Belgorod viloyati chegara hududlarini o‘qqa tutish sezilarli darajada oshdi. Ukraina tomonida jang qilayotgan Rossiya ko‘ngillilar korpusi va Rossiya ozodlik legioni bo‘linmalari Belgorod viloyatida bir necha bor reydlar uyushtirdi va chegaradagi aholi punktlari ustidan vaqtincha nazorat o‘rnatdi.
Bir necha kun oldin nodavlat notijorat tashkilotlari va O‘zbekiston biznes tuzilmalari Ukrainaga 10,5 tonna gumanitar yordam jo‘natgan edi. Ukrainaga jami 785 844 grivnaga (taxminan 21 282 dollar) qishki poyabzal, sport, bolalar va ayollar kiyimlari yuborilgan. Shuningdek, umumiy qiymati 157 771 grivna (taxminan 4 273 dollar) bo‘lgan tibbiy shprislar, tibbiy paxta va infuzion tizimlar jo‘natilgan.
Izoh (0)