So‘nggi kunlarda ijtimoiy tarmoqlarda turli soha vakillarining “Ochiq budjet” uchun ovoz yig‘ish ishlariga jalb qilinganlik holatlari yuzasidan xabarlar tarqatilmoqda. Kambag‘allikni qisqartirish va bandlik vazirligi xodimlarini ovoz yig‘ishga majburlagan rahbarlarga qanday javobgarlik borligini eslatdi.
“Tashabbusli budjetlashtirish amaliyotini yanada takomillashtirish hamda faol mahallalarni qo‘llab-quvvatlash chora-tadbirlari to‘g‘risida”gi qarorning 6-bandiga binoan, tashabbusli budjetlashtirish jarayonlari doirasida budjet tashkilotlarining rahbar xodimlari tomonidan majburiy ovoz yig‘ish bo‘yicha xodimlarga topshiriq berishlari taqiqlanadi. Bunda majburiy ovoz yig‘ishga majburlash tegishli tashkilot xodimlarini majburiy mehnatga jalb qilish sifatida tasniflanadi.
Mehnat kodeksining 5-moddasiga asosan majburiy mehnat taqiqlangan.
Ma’muriy javobgarlik to‘g‘risidagi kodeksning 51-moddasiga muvofiq majburiy mehnatga yo‘l qo‘ygan mansabdor shaxslarga BHMning 50 baravaridan 100 baravarigacha (16,5 million so‘mdan 33 million so‘mgacha) miqdorda jarima solinishiga sabab bo‘ladi. Xuddi shunday huquqbuzarlik ta’lim tashkilotining pedagog xodimiga nisbatan sodir etilgan bo‘lsa BHMning 100 baravaridan 150 baravarigacha miqdorda (33 million so‘mdan 49,5 million so‘mgacha) jarima solishga sabab bo‘ladi.
Takroran yoki voyaga yetmagan shaxsga nisbatan sodir etilsa, Jinoyat kodeksining 148-2-moddasiga ko‘ra jinoiy javobgarlik belgilangan.
Avvalroq Iqtisodiyot va moliya vazirligi “Tashabbusli budjet” jarayonlari doirasida majburiy ovoz berish holatlariga duch kelgan fuqarolarni bu haqda xabar berishga chaqirgandi.
Majburiy ovoz berish holatlariga duch kelgan fuqarolar vazirlikning ishonch raqamlariga: +99871 2035141, +99871 2035050 (ichki raqam — 01115), +99871 2031993 (ichki raqamlar — 01116, 01117) yoki “Ochiq budjet” axborot portalining onlayn murojaat bo‘limiga xabar berishi mumkin.
Izoh (0)