O‘zbekistonning Vladivostokdagi Bosh konsulligi ko‘magida Rossiyaning Uzoq Sharq federal okrugi hududida qonuniy vakillari bo‘lmagan 10 yoshli qiz vatanga qaytarildi. Bu haqda “Dunyo” agentligi xabar berdi.
Qayd etilishicha, 20-iyul kuni Bosh konsulxonaga Samarqand viloyatida tug‘ilgan fuqaro B.M. murojaat qilib, 17-mayda Xabarovsk shahrida tug‘ilgan qizi J.M.ni O‘zbekistonga qaytarishda amaliy yordam so‘ragan.
Diplomatlar tomonidan tegishli tashkilotlar bilan olib borilgan o‘rganishlar chog‘ida maʼlum bo‘lishicha, B.M. bir necha yil davomida Rossiyaning Xabarovsk shahrida vaqtincha mehnat faoliyati bilan shug‘ullanib kelgan. Ushbu davrda u Rossiya fuqarosi Ya.G. bilan tanishib, turmush qurgan. Turmushidan qizi J.M. dunyoga kelgan. Qizning onasi esa 2021-yilning 27-iyun kuni uzoq davom etgan og‘ir kasallikdan so‘ng vafot etgan.
2023-yilning iyun oyida B.M. Rossiya hududida migratsiya qonunchiligiga zid ravishda bo‘lib turgani sababli, u sud qarori asosida O‘zbekistonga majburiy tarzda chiqarib yuborilgan. 10 yoshli J.M. esa Rossiya huquq-tartibot idoralari tomonidan Xabarovsk o‘lkasidagi maxsus markazga joylashtirilgan.
Bosh konsulxona xodimlarining maxsus markaz rahbariyati bilan o‘tkazgan muzokaralari natijasida 10 yoshli qizni O‘zbekistonga yuborish bo‘yicha kelishuvga erishilgan.
Shundan so‘ng, J.M.ga Bosh konsulxona tomonidan tegishli tartibda “Vatanga qaytish” guvohnomasi rasmiylashtirilgan. Natijada O‘zbekiston fuqarosi 27-avgust kuni Xabarovsk—Novosibirsk—Samarqand yo‘nalishi bo‘yicha mamlakatga kelgan.
Bundan oldin Rossiyaga ishlash uchun borib, vafot etgan ayolning 9 yoshli qizi O‘zbekistonga qaytarilgani to‘g‘risida xabar berilgandi. Shuningdek, Misrda avtohalokatga uchrab, og‘ir tan jarohati olgan o‘zbekistonlik ayol vatanga qaytarilgan, Rossiyada eri qamalib, chaqalog‘i bilan qiyin ahvolda qolgan ayolga yordam ko‘rsatilgan edi.
Izoh (0)