Ўзбекистоннинг Владивостокдаги Бош консуллиги кўмагида Россиянинг Узоқ Шарқ федерал округи ҳудудида қонуний вакиллари бўлмаган 10 ёшли қиз ватанга қайтарилди. Бу ҳақда “Дунё” агентлиги хабар берди.
Қайд этилишича, 20 июль куни Бош консулхонага Самарқанд вилоятида туғилган фуқаро Б.М. мурожаат қилиб, 17 майда Хабаровск шаҳрида туғилган қизи Ж.М.ни Ўзбекистонга қайтаришда амалий ёрдам сўраган.
Дипломатлар томонидан тегишли ташкилотлар билан олиб борилган ўрганишлар чоғида маълум бўлишича, Б.М. бир неча йил давомида Россиянинг Хабаровск шаҳрида вақтинча меҳнат фаолияти билан шуғулланиб келган. Ушбу даврда у Россия фуқароси Я.Г. билан танишиб, турмуш қурган. Турмушидан қизи Ж.М. дунёга келган. Қизнинг онаси эса 2021 йилнинг 27 июнь куни узоқ давом этган оғир касалликдан сўнг вафот этган.
2023 йилнинг июнь ойида Б.М. Россия ҳудудида миграция қонунчилигига зид равишда бўлиб тургани сабабли, у суд қарори асосида Ўзбекистонга мажбурий тарзда чиқариб юборилган. 10 ёшли Ж.М. эса Россия ҳуқуқ-тартибот идоралари томонидан Хабаровск ўлкасидаги махсус марказга жойлаштирилган.
Бош консулхона ходимларининг махсус марказ раҳбарияти билан ўтказган музокаралари натижасида 10 ёшли қизни Ўзбекистонга юбориш бўйича келишувга эришилган.
Шундан сўнг, Ж.М.га Бош консулхона томонидан тегишли тартибда “Ватанга қайтиш” гувоҳномаси расмийлаштирилган. Натижада Ўзбекистон фуқароси 27 август куни Хабаровск—Новосибирск—Самарқанд йўналиши бўйича мамлакатга келган.
Бундан олдин Россияга ишлаш учун бориб, вафот этган аёлнинг 9 ёшли қизи Ўзбекистонга қайтарилгани тўғрисида хабар берилганди. Шунингдек, Мисрда автоҳалокатга учраб, оғир тан жароҳати олган ўзбекистонлик аёл ватанга қайтарилган, Россияда эри қамалиб, чақалоғи билан қийин аҳволда қолган аёлга ёрдам кўрсатилган эди.
Изоҳ (0)