O‘zbekistonda binolarni qurish va kapital taʼmirlash taqiqlangan hududlarda buni amalga oshirganlik uchun maʼmuriy va jinoiy javobgarlik kuchaytiriladi. Bu haqda seysmik xavfsizlikni taʼminlash tizimi takomillashtirilgani munosabati bilan Jinoyat kodeksi va Maʼmuriy javobgarlik to‘g‘risidagi kodeksga qo‘shimcha va o‘zgartirishlar kiritish haqida qonun loyihasida belgilandi.
Unda qayd etilishicha, so‘nggi vaqtlarda xorijiy mamlakatlarda sodir bo‘layotgan kuchli zilzilalar oqibatida yuzaga kelayotgan turli xil talafotlar mamlakatda seysmik xavfsizlikni taʼminlash, bino va inshootlarning zilzilabardoshligini oshirishga qaratilgan bir qator manzilli chora-tadbirlarni amaliyotga tatbiq etishni talab etmoqda.
Xususan, respublikada barpo etilayotgan va qayta taʼmirlanayotgan bino va inshootlarning zilzilabardoshligini oshirishda mazkur bino va inshootlarni barpo etayotgan va taʼmirlayotgan tashkilotlarning masʼuliyatini oshirish, shaharsozlik qonunchiligida belgilangan talablarga qatʼiy rioya etish borasida nazorat qilishni kuchaytirish zarurati yuzaga kelmoqda.
Shu munosabat bilan Jinoyat kodeksi 229-3-moddasi (belgilangan taqiqlarni (cheklovlarni) buzgan holda binolarni, inshootlarni yoki boshqa obyektlarni qurish, rekonstruksiya qilish va kapital taʼmirlash) birinchi qismining sanksiyasi quyidagicha o‘zgartirilmoqda:
“bazaviy hisoblash miqdorining 150 baravaridan 300 baravarigacha (49,5 million so‘mdan 99 million so‘mgacha) miqdorda jarima yoki 360 soatgacha majburiy jamoat ishlari yoxud 3 yilgacha axloq tuzatish ishlari yoki 1 yildan 3 yilgacha ozodlikni cheklash yoki 1 yildan 3 yilgacha ozodlikdan mahrum qilish bilan jazolanadi”.
Amalda bu harakatlar uchun BHMning 30 baravaridan 50 baravarigacha (9,9 million so‘mdan 16,5 million so‘mgacha) jarima yoki 360 soatgacha majburiy jamoat ishlari yoxud 3 yilgacha axloq tuzatish ishlari bilan jazolanadi.
Shuningdek, Maʼmuriy javobgarlik to‘g‘risidagi kodeksning 99-moddasi (Shaharsozlik to‘g‘risidagi qonunchilikni buzish) quyidagi mazmundagi ikkinchi qism bilan to‘ldirilmoqda:
“Shaharsozlik hujjatlarini ishlab chiquvchilarning buyurtmachiga qurilish-montaj ishlarini shaharsozlik hujjatlariga muvofiq amalga oshirish bo‘yicha beriladigan yozma ko‘rsatmalarini buyurtmachi tomonidan bajarishdan bo‘yin tovlash yoki o‘z vaqtida bajarmaslik — fuqarolarga bazaviy hisoblash miqdorining 5 baravaridan 10 baravarigacha (1 million 650 ming so‘mdan 3,3 million so‘mgacha) , mansabdor shaxslarga esa — 10 baravaridan 20 baravarigacha (3,3 million so‘mdan 6,6 million so‘mgacha) miqdorda jarima solishga sabab bo‘ladi”.
Hujjatda qayd etilishicha, ushbu qonun shaharsozlik to‘g‘risidagi qonunchilikka muvofiq binolarni, inshootlarni qurishga va kapital taʼmirlashga taqiqlar belgilangan hududlarda shunday ishlarni amalga oshirganlik uchun maʼmuriy va jinoiy javobgarlikni kuchaytiradi, shuningdek, loyiha tashkilotining loyihaga muvofiq ijro etilishi majburiy bo‘lgan ko‘rsatmalarni bajarmaganlik uchun javobgarlikni belgilaydi va qurilish sohasida shaharsozlik qonunchiligiga qatʼiy rioya etilishiga xizmat qiladi.
Izoh (0)