Britaniya hukumati noqonuniy muhojirlarning boshpana so‘rovlari ko‘rib chiqilayotgan vaqtda ularni maxsus markazlarda saqlash xarajatlarini kamaytirish uchun ularga GPS-kuzatuvchi elektron bilaguzuklar berish imkoniyatini muhokama qilmoqda. Bu haqda The Times hukumatdagi manbalarga tayanib xabar berdi.
Hozirda Buyuk Britaniyada 175 000 dan ortiq odam boshpana so‘roviga hukumatdan javob kutmoqda, deya qayd etdi gazeta. Shu bilan birga, arizalarni ko‘rib chiqish davrida qochqinlar maxsus markazlarga joylashtiriladi, ammo mamlakatda bunday joylar yetarli emas.
Bundan tashqari, noqonuniy muhojirlarni saqlash Britaniya soliq to‘lovchilariga yiliga taxminan 4 milliard funt sterlingga (5 milliard dollar) tushadi, deyiladi maqolada. Xususan, 50 mingdan ortiq noqonuniy muhojirni mehmonxonalarga joylashtirish uchun kuniga taxminan 6 million funt sterling (7,5 million dollar) kerak bo‘ladi.
Muhojirlarni hibsga olishning “muqobilini topish” va ularni saqlash xarajatlarini kamaytirish istagidan kelib chiqib, Ichki ishlar vazirligi hukumatga noqonuniy muhojirlarga GPS elektron bilaguzuklar taqishni taklif qilgan. 2025-yilning martiga qadar 25 ming nafar noqonuniy muhojirlarni shunday bilaguzuklar bilan taʼminlash rejalashtirilgan. Shu bilan birga, hukumat amaldorlari buning uchun katta xarajat talab qilinishidan xavotirda, bilaguzuklar ham yetmasligi mumkin, deb yozadi gazeta.
Britaniya Ichki ishlar vazirligidagi yana bir manbaning aytishicha, asosiy yechim — noqonuniy muhojirlarni saqlash joylarini ko‘paytirish, shu bilan birga elektron bilakuzuklar varianti ham muhokama qilinmoqda. Gazetaning qayd etishicha, so‘nggi uch yil ichida La-Mansh bo‘ylab o‘tgan noqonuniy muhojirlar soni deyarli 500 foizga oshgan va faqatgina 2023-yil boshidan buyon kelganlar 19 ming kishini tashkil etadi.
Buyuk Britaniya bosh vaziri Rishi Sunak noqonuniy migratsiyaga qarshi kurashni o‘z siyosatining asosiy ustuvor yo‘nalishlaridan biri deb atagandi.
Izoh (0)