Британия ҳукумати ноқонуний муҳожирларнинг бошпана сўровлари кўриб чиқилаётган вақтда уларни махсус марказларда сақлаш харажатларини камайтириш учун уларга GPS-кузатувчи электрон билагузуклар бериш имкониятини муҳокама қилмоқда. Бу ҳақда The Times ҳукуматдаги манбаларга таяниб хабар берди.
Ҳозирда Буюк Британияда 175 000 дан ортиқ одам бошпана сўровига ҳукуматдан жавоб кутмоқда, дея қайд этди газета. Шу билан бирга, аризаларни кўриб чиқиш даврида қочқинлар махсус марказларга жойлаштирилади, аммо мамлакатда бундай жойлар етарли эмас.
Бундан ташқари, ноқонуний муҳожирларни сақлаш Британия солиқ тўловчиларига йилига тахминан 4 миллиард фунт стерлингга (5 миллиард доллар) тушади, дейилади мақолада. Хусусан, 50 мингдан ортиқ ноқонуний муҳожирни меҳмонхоналарга жойлаштириш учун кунига тахминан 6 миллион фунт стерлинг (7,5 миллион доллар) керак бўлади.
Муҳожирларни ҳибсга олишнинг “муқобилини топиш” ва уларни сақлаш харажатларини камайтириш истагидан келиб чиқиб, Ички ишлар вазирлиги ҳукуматга ноқонуний муҳожирларга GPS электрон билагузуклар тақишни таклиф қилган. 2025 йилнинг мартига қадар 25 минг нафар ноқонуний муҳожирларни шундай билагузуклар билан таъминлаш режалаштирилган. Шу билан бирга, ҳукумат амалдорлари бунинг учун катта харажат талаб қилинишидан хавотирда, билагузуклар ҳам етмаслиги мумкин, деб ёзади газета.
Британия Ички ишлар вазирлигидаги яна бир манбанинг айтишича, асосий ечим — ноқонуний муҳожирларни сақлаш жойларини кўпайтириш, шу билан бирга электрон билакузуклар варианти ҳам муҳокама қилинмоқда. Газетанинг қайд этишича, сўнгги уч йил ичида Ла-Манш бўйлаб ўтган ноқонуний муҳожирлар сони деярли 500 фоизга ошган ва фақатгина 2023 йил бошидан буён келганлар 19 минг кишини ташкил этади.
Буюк Британия бош вазири Риши Сунак ноқонуний миграцияга қарши курашни ўз сиёсатининг асосий устувор йўналишларидан бири деб атаганди.
Изоҳ (0)