Sog‘liqni saqlash vaziri Amrillo Inoyatov O‘zbekistonda har yili 1 million nafarga yaqin bola tug‘ilayotganini, ularda tug‘ma nuqsonlar kuzatilayotgani-yu, buni davolashda Toshkent shahrida faoliyat yuritayotgan Bolalar milliy tibbiyot markazining o‘rni beqiyos ekanini maʼlum qildi.
Vazirning bildirishicha, mazkur tibbiyot markazi 2019-yil 130 million dollar mablag‘ evaziga qurilib, foydalanishga topshirilgan.
Oxirgi besh-olti yilda muhtaram prezidentimiz barcha soha kabi tibbiyotda ham juda katta islohotlarni boshlab berdi. Siz bilan men turgan shu dargoh Markaziy Osiyoda yagona bo‘lib, 130 million dollarga qurilgan. O‘xshashi bo‘lmagan bino-inshoot, ichidagi jihozlar ulug‘ niyatlar bilan ochilgan. Bugun mamlakatimizda har yili 1 million nafarga yaqin chaqaloq tug‘ilmoqda. Bir million nafarga yaqin bola tug‘ilayotgan paytda ularda tug‘ma va orttirilgan nuqsonlar ham kuzatilmoqda. Mana shu nuqsonlarni erta davolash, ularning oldini olish uchun ham mana shu markaz qurilgan, — deydi vazir.
Amrillo Inoyatovning aytishicha, mazkur markazda faoliyat yurituvchi tibbiyot xodimlarining aksariyati xorijda tajriba orttirib qaytgan.
Joriy yilning iyul oyida O‘zbekistonda birinchi marotaba qon saratoni, oqqon kasalligi bo‘lgan bolalarda suyak komigi autotransplantatsiyasi amaliyoti Hindiston va Belarus davlatlaridan kelgan mutaxassislar bilan hamkorlikda muvaffaqqiyatli amalga oshirildi. Hozirgina uch nafar bolani o‘zim ko‘rib kelyapman. Qon tahlillari ko‘rsatkichlarida ijobiy dinamika kun sayin, soat sayin kuzatilmoqda. Bu mamlakatimiz, shu bolalar milliy markazining maqtansa arziydigan yutug‘i, deb aytsam to‘g‘ri bo‘ladi, — deydi vazir Inoyatov.
Vazirning taʼkidlashicha, mazkur amaliyotga 10 ming dollar sarflangan.
Mazkur amaliyot hozirgi kunda chet mamlakatlar, masalan, Turkiya va Belarusda 120-170 ming dollar evaziga amalga oshirilishini inobatga olsak, markazda ushbu amaliyotning amalga oshirilishi mamlakatimiz tibbiyot sohasida erishgan katta yutuqlardan biri ekanini ko‘rsatadi, — deydi masʼul.
Sog‘liqni saqlash vazirining qo‘shimcha qilishicha, 2023-yilda Qoraqalpog‘istonning Nukus shahrida tug‘ma nuqson bilan tug‘ilgan bir kunlik chaqaloqda murakkab jarrohlik amaliyoti o‘tkazilgan.
Bundan ikki yil muqaddam hukumatlararo komissiya aʼzosi sifatida Hindistonda bo‘lganimizda u yerdagi yirik klinika masʼullari “Biz bugun chala tug‘ilgan, 800-900 gramm tug‘ilgan bolalarda tug‘ma yurak nuqsoni bo‘yicha jarrohlik amaliyotlarini amalga oshiryapmiz”, deyishganida, vazirning birinchi o‘rinbosari sifatida O‘zbekistonda ham ikki yil ichida shu texnologiyani joriy qilamiz, deb niyat qilgandik. Bugun amalga oshirdik, — deydi vazir.
Vazirga ko‘ra, Samarqand shahrida ayni paytda 450 gramm og‘irlikda chala tug‘ilgan 12 nafar bola parvarishlanmoqda.
Bu xalqaro darajadagi yutuq hisoblanadi, — deydi vazir.
Sog‘liqni saqlash vaziri ushbu muvaffaqiyatlarni amalga oshirgan tibbiyot xodimlarini “Sog‘liqni saqlash vazirligi aʼlochisi” deya eʼtirof etib, 50, 20, 5 va 3 million so‘mlik vaucherlar bilan mukofotladi.
Izoh (0)