2023-yil sog‘liqni saqlash tizimida “Korrupsiyaga qarshi kurash yili” bo‘ladi. Bu haqda bugun (4-yanvar) bo‘lib o‘tgan hay’at yig‘ilishi sog‘liqni saqlash vaziri Amrillo Inoyatov aytib o‘tdi.
Vazirlik axborot xizmati xabariga ko‘ra, Amrillo Inoyatov joriy yilda tizimda korrupsiyaga qarshi kurashish kuchaytirilishini ta’kidlagan.
“Ko‘pchilikka ma’lum bo‘lgan korrupsiya urchigan bir qator yo‘nalishlar borki, birinchi navbatda ularga barham berishimiz kerak. Xususan, ishga joylashtirish, ayniqsa hamshiralarni, roddomlardagi “suyunchi puli”, “kesarcha kesish” uchun belgilangan stavkalar, order berishdagi tanish-bilishchilik kabi illatlar mavjudligini hamma biladi.
Afsuski, shu ishlarni amalga oshirayotgan ayrim nopok shaxslar tufayli butun tizim sha’niga dog‘ tushmoqda. Yangi yilni tizimda “Korrupsiyaga qarshi kurash yili” deb e’lon qilamiz. Vazirlikning maxsus “Ishonch telefoni” tashkil etiladi. Shu bilan birga ishonch telefoni sifatida o‘zimning shaxsiy raqamimni ham kiritaman”, – degan u.
Shu bilan birga, majlisda malaka toifasini berishda inson omili aralashmaydigan, shaffof, uch bosqichli yangi tizim joriy etilishi aytilgan.
“Ta’lim yo‘nalishidagi byurokratik to‘siqlarga barham beriladi. Jumladan, metodik qo‘llanmalar, monografiyalar, uslubiy qo‘llanmalar, ilmiy ishlarga xulosalar berishni vazirlik tomonidan tasdiqlash tizimi bekor qilinib, barcha vakolatlar endilikda OTMlar va ixtisoslashtirilgan markazlar tomonidan amalga oshiriladi.
Bundan tashqari, 2023-yil 1-apreldan boshlab, malaka toifasi olish bo‘yicha taqdim etiladigan hujjatlari Davlat xizmatlari markazlari orqali faqat elektron shaklda qabul qilish tartibi joriy etiladi.
Malaka toifa sertifikatlari QR-kod qo‘yilgan holda elektron shaklda rasmiylashtiriladi.
Keyingi yildan boshlab farmatsevtika va tibbiyot xodimlari faoliyatini bosqichma-bosqich litsenziyalashga o‘tamiz”, – degan Amrillo Inoyatov.
Avvalroq Amrillo Inoyatov sog‘liqni saqlash vaziri lavozimiga tasdiqlangani xabar qilingandi.
Izoh (0)