Toshkent davlat iqtisodiyot universiteti mazkur OTM professor-o‘qituvchilariga bir xil forma joriy etilishi, universitet rektorat binosi eshigining yopilgani hamda matbuot kotibiga katta miqdorda mukofot puli berilgani to‘g‘risida tarqalgan xabarlarga munosabat bildirdi.
Qayd etilishicha, Toshkent davlat iqtisodiyot universiteti Odob-axloq kodeksining 11-bandiga asosan universitetda professor-o‘qituvchi, xodim, doktorant va talabalar o‘z o‘qish va kasbiga mos zamonaviy kiyimda bo‘lishlari lozimligi belgilab qo‘yilgan. Universitetning ushbu ichki hujjati jamoaviy kelishuv asosida qabul qilingan.
“Universitet tomonidan forma joriy etilishi oliygoh brendini rivojlantirish va jamoatchilik o‘rtasida ijobiy imijni shakllantirishga qaratilgan bo‘lib, formani olish yoki kiyish hech kimga majburiy emas. Mahsulot ma’qul kelgan taqdirda, olishlari mumkinligi haqida professor-o‘qituvchilarga xabar berilgan”, — deyiladi munosabatda.
Ta’kidlanishicha, yangi o‘quv yiliga tayyorgarlik ishlari doirasida rektoratga chiqish zinalari qayta ta’mirlanmoqda. Bu vaziyatda xavfsizlikni ta’minlash va ishchi-ustalar faoliyatiga xalaqit bermaslik maqsadida bino eshigi qisqa muddatga yopilgan.
Shuningdek, munosabatda universitet matbuot kotibiga 100 million so‘m miqdorida mukofot puli yozilgani rad etilgan.
“Universitet axborot siyosati masalalari bo‘yicha rektor maslahatchisi — matbuot kotibi Iroda Tursunboyevaga nisbatan ham haqiqatga mutlaqo zid bo‘lgan ma’lumotlar yozilgan. Ya’ni unga Ijtimoiy-ma’naviy muhitni ta’minlashga mas’ul rektor maslahatchisi 100 million so‘m miqdorda mukofot puli yozdirib bergani urg‘ulangan. Bu yolg‘on ma’lumot ekani va haqiqatga mutlaqo to‘g‘ri kelmasligini ma’lum qilamiz. Shaxs qadr-qimmati, sha’nini toptash, uni jamoat orasida obro‘sizlantirganlik uchun har bir shaxs qonun oldida javobgarligini eslatib o‘tamiz”, — deyiladi munosabatda.
Toshkent davlat iqtisodiyot universitetida 2019-yil 25-noyabrdan boshlab o‘qish haftasi besh kunlik etib belgilangandi. Shuningdek, o‘shanda universitetda forma ham butunlay bekor qilingani ma’lum bo‘lgandi. “Endi talabalar o‘qishga istalgan kiyimida kelishi mumkin. Hech kim ularni ko‘ylak kiyishga, galstuk taqishga majburlamaydi”, — deyilgan edi xabarda.
Izoh (0)