Sog‘liqni saqlash vaziri Amrillo Inoyatov O‘zbekistondagi mavjud poliklinikalar bundan 5-10 yil avval issig‘i chiqqan yosh bolaga, qon bosimi oshgan keksalarga ham yordam ko‘rsatolmaydigan darajada bo‘lganini tan oldi. Bu haqda vazir Toshkent tumanlararo perinatal markazi ochilishida gapirdi, deya xabar berdi “Daryo” muxbiri.
Maʼlum bo‘lishicha, sog‘liqni saqlash vaziri Amrillo Inoyatov hamda Toshkent viloyati hokimi Zoir Mirzayev bugun Toshkent tumanlararo perinatal markazi ochilishida OAV vakillariga ko‘rinish bergan.
Qayd etilishicha, shu paytgacha Toshkent viloyatining Bekobod, Yangiyo‘l, Olmaliq shaharlari va Quyi Chirchiq tumanida tumanlararo perinatal markazlar tashkil etilgan.
“Bunga qadar 110 o‘rinli Toshkent tumani tug‘uruq kompleksida yiliga 5,5 mingga yaqin tug‘uruq qayd etilib, faqatgina shu hudud aholisiga xizmat ko‘rsatgan. Shifoxona asosan asoratsiz tug‘uruqlarni qabul qilishga mo‘ljallangan bo‘lib, asoratli va kam vazn bilan tug‘ilgan chaqaloqlar respublika muassasalariga va Chirchiq shahrida joylashgan viloyat perinatal markaziga 50—70 kilometr masofa bosib olib borilar edi. Tug‘uruq majmuasini perinatal markazga aylantirish uchun 18,2 milliard so‘m investitsiya dasturi doirasida mablag‘ sarflandi. Markaz zamonaviy tibbiy asbob-uskunalar bilan to‘liq jihozlandi. Buning uchun 2,1 milliard so‘m mablag‘ ajratildi. Muassasada qo‘shimcha 10 o‘rinli Chaqaloqlar patologiyasi va 6 o‘rinli Chaqaloqlar reanimatsiyasi bo‘limlari tashkil etildi”, — deydi tumanlararo perinatal markaz ochilishida so‘z olganlar.
Mazkur tadbirda so‘z olgan Sog‘liqni saqlash vaziri Amrillo Inoyatov O‘zbekistondagi mavjud poliklinikalar bundan 5-10 yil avval issig‘i chiqqan yosh bolaga ham, qon bosimi oshgan keksalarga ham yordam ko‘rsatolmaydigan darajada ekanini aytdi.
“Ona bolasi temperatura qilsa, bolasini 50—70 kilometr joyga ko‘tarib borganda yoki qariyalarimiz kasal bo‘lib qolganda, qon bosimi oshganda poliklinikalarimizda yordam berolmaganimiz achchiq haqiqat-ku. Bugun prezidentimizning odilona siyosati sabab bu poliklinikalarimiz aholiga yaqinlashdi”, — deydi vazir.
Sog‘liqni saqlash vazirining qo‘shimcha qilishicha, O‘zbekistondagi mavjud poliklinikalarda ayni kunga kelib Jahon sog‘liqni saqlash tashkiloti standartlariga to‘g‘ri keladigan imkoniyat yaratildi.
“Jahon sog‘liqni saqlash tashkiloti standartlariga qaraganda, bemor har 3 kilometrda, yaʼni 20 daqiqaning ichida poliklinikalarga yetib borishi kerak va lozim bo‘lgan yordamni olishi darkor. Bu xalqaro darajadagi talabga javob beruvchi imkoniyatlar bugun O‘zbekistonda ham yaratildi. Sog‘liqni saqlash vazirligi juda katta marralarni ko‘zlagan. Ishoning, bu balandparvoz gap emas”, — deydi vazir.
Vazirning bildirishicha, kelajakda bemorlardagi 70 foiz kasalliklarga tibbiyotning birlamchi bo‘g‘inida bepul yordam ko‘rsatiladi.
“Tibbiyotning birlamchi bo‘g‘inida bemorlarda uchrayotgan kasalliklarning 70 foiziga bepul daʼvo qilinadi. Davlat tomonidan bepul dori, yotoq va shifokor xizmati kafolatlanadi. Yaqinda bu haqida ham eshitasizlar”, — deydi Amrillo Inoyatov.
Izoh (0)