“Chekka hududlardagi poliklinikalar yo‘q qilingandi” — Amrillo Inoyatov aholi duch kelgan qiyinchilik haqida gapirdi

Buxoro shahrida “Konstitutsiya o‘zimizniki” shiori ostida Konstitutsiyaviy qonun loyihasi bo‘yicha targ‘ibot tadbiri va konsert dasturi bo‘lib o‘tdi. Unda sog‘liqni saqlash vazirligi rasmiysi Amrillo Inoyatov ham ishtirok etib, 15-20 yil oldin aholi duch kelgan qiyinchiliklar haqida gapirdi.

Targ‘ibot tadbirida 14 ming 400 kishi ishtirok etdi. Futbol bo‘yicha U-20 Osiyo Kubogi—2023 da g‘alaba qozongan O‘zbekiston terma jamoasi a’zosi va paralimpiyachi ham ishtirokchilarni referendumda ovoz berishga chaqirdi. Tadbir davomida Konstitutsiyaga kiritilayotgan yangiliklar to‘g‘risida, shuningdek, referendum o‘tkazish tartibi, unda ishtirok etish bo‘yicha huquqiy tushuntirishlar berildi.

Shunindek, tadbirda buxorolik tadbirkor Nasriddin Rashidov, Qorako‘l tumanidagi Xalqaro matematika maktabi direktori Temur Ro‘ziyev, buxorolik jurnalist Obid Shabanov spiker sifatida ishtirok etdi.

Sog‘liqni saqlash vazirligi rasmiysi Amrillo Inoyatov 15-20 yil muqaddam tibbiyot juda og‘ir ahvolda bo‘lgani, shifokorlarimiz yetishmasgani, sababi ular chet elga ishlagani ketganini aytdi.

“Tibbiyot muassasalarimizga dori-darmon yetishmasdi. Tibbiy jihozlar yetishmovchiligi bor edi. Olis va chekka qishloq hududlarida poliknilikalar yo‘q qilingandi. Aholimiz qiynalib, turli yo‘llar bilan hatto 70 km uzoqlikdagi poliklinikalarga, tuman markazlariga yoki Respublikaga borishga majbur bo‘lardi”, — deydi u.

Shunindek, Inoyatov 2016-yildan boshlab tibbiyotda tub burilish bo‘lgani, qisqartirilgan, optimallashtirilgan 2 mingta poliklinikalarimiz qurila boshlaganini qayd etdi.

“Ularning ichidagi dori-darmon, jihozlar yangidan ta’mirlana boshlandi. Bugun Yangi O‘zbekistonimizda yangi inqilobiy islohotlarni kim amalga oshiradi? Albatta, sog‘lom xalq, sog‘lom millat amalga oshiradi. Bugun Konstitusiyaning 48-moddasida aholining milliy genofoni uchun shoshilinch va tez tibbiy yordam bepul ekani va tibbiy xizmat, dori-darmon kafolatlangan paketda ayrim hajmlari aniq davlat tomonidan bepul ekani aniq ko‘rsatib berilmoqda”, — deydi rasmiy.

Inoyatov tadbir ishtirokchilariga 30-aprelda referendumda qatnashib, ovoz berishini aytdi va referendum jarayonida befarq bo‘lmaslikka chaqirdi.