Toshkent shahar Maktabgacha va maktab ta’limi boshqarmasi poytaxtdagi maktablarning birida janjal yuz bergani aytilgan xabarlarga munosabat bildirdi.
Ijtimoiy tarmoqlarda Yakkasaroy tumanidagi 160-sonli umumtaʼlim maktabida tekshiruvchilar o‘qituvchilar va direktorga asossiz ayblovlar qo‘yishi oqibatida janjal yuzaga kelgani aytilgan xabarlar tarqaldi.
Boshqarmaning ma’lum qilishicha, so‘nggi paytlarda 160-sonli umumtaʼlim maktabi maʼmuriyati faoliyati yuzasidan eʼtiroz va shikoyatlar ko‘paygan. Shu shikoyatlar bo‘yicha Toshkent shahar hamda Yakkasaroy tumani prokuraturasi tomonidan o‘rganishlar olib borilgan. O‘rganish va surishtiruv bo‘yicha tegishli hujjatlar yakuniy xulosa uchun huquq-tartibot idoralariga taqdim etilgan.
“Videolavhada aks etgan holatning maktab maʼmuriyati va o‘qituvchilariga umuman aloqasi yo‘qligini maʼlum qilamiz. Unda o‘quvchining buvisi hamda o‘qituvchi o‘rtasidagi muloqot aks etgan, xolos”, — deyiladi munosabatda.
Ta’kidlanishicha, hozirda Toshkent shahar Maktabgacha va maktab taʼlimi boshqarmasi 160-maktabdagi vaziyatni to‘liq o‘z nazoratiga olgan.
Bundan avval Toshkentdagi maktabda o‘qituvchilar majburiy mehnatga jalb qilingani haqida xabar tarqalgandi. Toshkent shahar maktabgacha va maktab ta’limi boshqarmasi maktabda “Obodonlashtirish oyligi” doirasida xayrli tadbir tashkil qilingani, bu ijtimoiy tarmoq sahifalarida noto‘g‘ri talqin qilinganini bildirgandi.
Izoh (0)