Соғлиқни сақлаш вазири Амрилло Иноятов Ўзбекистонда ҳар йили 1 миллион нафарга яқин бола туғилаётганини, уларда туғма нуқсонлар кузатилаётгани-ю, буни даволашда Тошкент шаҳрида фаолият юритаётган Болалар миллий тиббиёт марказининг ўрни беқиёс эканини маълум қилди.
Вазирнинг билдиришича, мазкур тиббиёт маркази 2019 йил 130 миллион доллар маблағ эвазига қурилиб, фойдаланишга топширилган.
Охирги беш-олти йилда муҳтарам президентимиз барча соҳа каби тиббиётда ҳам жуда катта ислоҳотларни бошлаб берди. Сиз билан мен турган шу даргоҳ Марказий Осиёда ягона бўлиб, 130 миллион долларга қурилган. Ўхшаши бўлмаган бино-иншоот, ичидаги жиҳозлар улуғ ниятлар билан очилган. Бугун мамлакатимизда ҳар йили 1 миллион нафарга яқин чақалоқ туғилмоқда. Бир миллион нафарга яқин бола туғилаётган пайтда уларда туғма ва орттирилган нуқсонлар ҳам кузатилмоқда. Мана шу нуқсонларни эрта даволаш, уларнинг олдини олиш учун ҳам мана шу марказ қурилган, — дейди вазир.
Амрилло Иноятовнинг айтишича, мазкур марказда фаолият юритувчи тиббиёт ходимларининг аксарияти хорижда тажриба орттириб қайтган.
Жорий йилнинг июль ойида Ўзбекистонда биринчи маротаба қон саратони, оққон касаллиги бўлган болаларда суяк комиги аутотрансплантацияси амалиёти Ҳиндистон ва Беларусь давлатларидан келган мутахассислар билан ҳамкорликда муваффаққиятли амалга оширилди. Ҳозиргина уч нафар болани ўзим кўриб келяпман. Қон таҳлиллари кўрсаткичларида ижобий динамика кун сайин, соат сайин кузатилмоқда. Бу мамлакатимиз, шу болалар миллий марказининг мақтанса арзийдиган ютуғи, деб айтсам тўғри бўлади, — дейди вазир Иноятов.
Вазирнинг таъкидлашича, мазкур амалиётга 10 минг доллар сарфланган.
Мазкур амалиёт ҳозирги кунда чет мамлакатлар, масалан, Туркия ва Беларусда 120-170 минг доллар эвазига амалга оширилишини инобатга олсак, марказда ушбу амалиётнинг амалга оширилиши мамлакатимиз тиббиёт соҳасида эришган катта ютуқлардан бири эканини кўрсатади, — дейди масъул.
Соғлиқни сақлаш вазирининг қўшимча қилишича, 2023 йилда Қорақалпоғистоннинг Нукус шаҳрида туғма нуқсон билан туғилган бир кунлик чақалоқда мураккаб жарроҳлик амалиёти ўтказилган.
Бундан икки йил муқаддам ҳукуматлараро комиссия аъзоси сифатида Ҳиндистонда бўлганимизда у ердаги йирик клиника масъуллари “Биз бугун чала туғилган, 800-900 грамм туғилган болаларда туғма юрак нуқсони бўйича жарроҳлик амалиётларини амалга оширяпмиз”, дейишганида, вазирнинг биринчи ўринбосари сифатида Ўзбекистонда ҳам икки йил ичида шу технологияни жорий қиламиз, деб ният қилгандик. Бугун амалга оширдик, — дейди вазир.
Вазирга кўра, Самарқанд шаҳрида айни пайтда 450 грамм оғирликда чала туғилган 12 нафар бола парваришланмоқда.
Бу халқаро даражадаги ютуқ ҳисобланади, — дейди вазир.
Соғлиқни сақлаш вазири ушбу муваффақиятларни амалга оширган тиббиёт ходимларини “Соғлиқни сақлаш вазирлиги аълочиси” дея эътироф этиб, 50, 20, 5 ва 3 миллион сўмлик ваучерлар билан мукофотлади.
Изоҳ (0)