Apple kompaniyasi iPhone 15 Pro Max nomini iPhone 15 Ultra’ga o‘zgartirishni ko‘rib chiqmoqda. Bu haqda kompaniyadagi insayderlar xabar bermoqda.
Mazkur o‘zgarish ushbu modelning eksklyuzivligi va yuqori maqomini ta’kidlashi mumkin.
“Ultra” nomi allaqachon Apple kompaniyasining boshqa mahsulotlarda, masalan, Apple Watch Ultra’da ishlatilgan va bu qurilmada maxsus xususiyatlar yoki materiallardan foydalanilganini ko‘rsatadi.
Bundan tashqari, yangi iPhone’lar odatdagi Lightning o‘rniga USB-C portiga ega bo‘lishi kutilmoqda. Shuningdek, iPhone 15 bilan birga yangi USB-C kabellari ham taqdim etiladi. Bu kabellar qurilma rangiga mos bo‘lishi ma’lum qilingan.
iPhone 15 Pro Max tarixdagi eng qimmat iPhone bo‘ladi. U qanday afzalliklarga ega?
2023-yilda Apple iPhone 15 ning eng qimmat versiyasi — Pro Max narxini oshiradi. AQSHda xuddi shu darajadagi joriy model (14 Pro Max) 1099 dollar turadi.
Insayder yangi iPhone’ning Pro Max’dan tashqari boshqa modellari narxi o‘zgarishsiz qolishini aytmoqda. iPhone 15 Pro Max tarixdagi eng qimmat iPhone bo‘lishi haqidagi mish-mishlar 2022-yil oxiridan beri tarqalib kelmoqda.
Kattaroq batareya va displeydan tashqari, iPhone 15 Pro Max 15 Pro’dan bitta katta farqqa ega bo‘lishi kutilmoqda. Bu 5X yoki 6X zoomli periskop linzalardir. Hozirgi iPhone modellari rasmlarni faqat 3x kattalashtirishga qodir.
Apple kompaniyasining yangi smartfonlar haqidagi kuzgi taqdimoti yaqinlashib borgan sari ko‘proq ma’lumotlar paydo bo‘lmoqda. Jumladan, iPhone 15 ning barcha modellari oshirilgan batareya quvvatlariga ega bo‘lishi kutilmoqda.
Shunday qilib, smartfonlarni qayta zaryadlamasdan ishlash muddati uzayishi mumkin. iPhone 15 Pro va iPhone 15 uchta yangi rangda – malina, “yalpiz” yashil va och ko‘kda chiqarilishi haqida ma’lumotlar bor.
Izoh (0)