Apple компанияси iPhone 15 Pro Мах номини iPhone 15 Ultra’га ўзгартиришни кўриб чиқмоқда. Бу ҳақда компаниядаги инсайдерлар хабар бермоқда.
Мазкур ўзгариш ушбу моделнинг эксклюзивлиги ва юқори мақомини таъкидлаши мумкин.
“Ultra” номи аллақачон Apple компаниясининг бошқа маҳсулотларда, масалан, Apple Watch Ultra’да ишлатилган ва бу қурилмада махсус хусусиятлар ёки материаллардан фойдаланилганини кўрсатади.
Бундан ташқари, янги iPhone’лар одатдаги Lightning ўрнига USB-C портига эга бўлиши кутилмоқда. Шунингдек, iPhone 15 билан бирга янги USB-C кабеллари ҳам тақдим этилади. Бу кабеллар қурилма рангига мос бўлиши маълум қилинган.
iPhone 15 Pro Мах тарихдаги энг қиммат iPhone бўлади. У қандай афзалликларга эга?
2023 йилда Apple iPhone 15 нинг энг қиммат версияси — Pro Мах нархини оширади. АҚШда худди шу даражадаги жорий модел (14 Pro Мах) 1099 доллар туради.
Инсайдер янги iPhone’нинг Pro Мах’дан ташқари бошқа моделлари нархи ўзгаришсиз қолишини айтмоқда. iPhone 15 Pro Мах тарихдаги энг қиммат iPhone бўлиши ҳақидаги миш-мишлар 2022 йил охиридан бери тарқалиб келмоқда.
Каттароқ батарея ва дисплейдан ташқари, iPhone 15 Pro Мах 15 Pro’дан битта катта фарққа эга бўлиши кутилмоқда. Бу 5Х ёки 6Х зоомли перископ линзалардир. Ҳозирги iPhone моделлари расмларни фақат 3х катталаштиришга қодир.
Apple компаниясининг янги смартфонлар ҳақидаги кузги тақдимоти яқинлашиб борган сари кўпрoқ маълумотлар пайдо бўлмоқда. Жумладан, iPhone 15 нинг барча моделлари оширилган батарея қувватларига эга бўлиши кутилмоқда.
Шундай қилиб, смартфонларни қайта зарядламасдан ишлаш муддати узайиши мумкин. iPhone 15 Pro ва iPhone 15 учта янги рангда – малина, “ялпиз” яшил ва оч кўкда чиқарилиши ҳақида маълумотлар бор.
Изоҳ (0)