Xitoy Milliy xavfsizlik vazirligi 39 yoshli davlat xizmatchisini AQSH Markaziy razvedka boshqarmasida ishlaganlikda gumon qilib hibsga oldi. Bu haqda South China Morning Post xabar berdi.
Nashr maʼlumotlariga ko‘ra, bu AQSH josusi deb gumon qilingan bir oy ichida ikkinchi hibsga olish holatidir. Qo‘lga olingan shaxsning ismi Xao, uning jinsi, u ishlayotgan vazirlik haqida xabar berilmagan.
Rasmiylarning ta’kidlashicha, Xao Yaponiyada tahsil olayotgan paytda AQSH vizasiga murojaat qilgan. O‘sha payti u AQSH Markaziy razvedka boshqarmasi tomonidan josus sifatida yollangan.
Keyin u amerikalik Ted ismli shaxs va allaqachon Markaziy razvedka boshqarmasida ishlayotgan Xitoy fuqarosi Li Sziyun bilan uchrashgan. Ular birgalikda Xaoni Vashingtonda ishlashga ishontirgan.
“Xao o‘zining josuslik faoliyatini Xitoyga qaytganidan so‘ng, mamlakat vazirliklaridan birida ishga joylashgach boshlagan. U to‘plangan ma’lumotlarni uzatish va pul mukofotini olish uchun Xitoydagi AQSH razvedkasi vakillari bilan bir necha bor uchrashgan”, — deyiladi xabarda.
10-avgust kuni Milliy xavfsizlik vazirligi Markaziy razvedka boshqarmasida ishlaganlikda gumon qilinayotgan Xitoy davlat harbiy-sanoat korxonasining 52 yoshli xodimi hibsga olingani haqida xabar berdi.
Izoh (0)