Ukrainada Rossiya Sanoat va savdo vazirligi huzuridagi kimyoviy qurolni xavfsiz saqlash va yo‘q qilish federal boshqarmasi boshlig‘i, rossiyalik general-polkovnik Valeriy Kapashinning mol-mulki hibsga olindi. Bu haqda Ukraina xavfsizlik xizmati xabar berdi.
Aktivlar ro‘yxatiga Poltava viloyatidagi 20 dan ortiq savdo obyektlari, 3 ming kvadrat metrdan ortiq turar joy ko‘chmas mulki va 17 ta yer uchastkasi kiradi.
Hibsga olingan mulklar orasida Kapashinlar oilasining uyi, premium mehmonxonalar va restoranlar, shuningdek, umumiy maydoni qariyb 30 ming metr kvadrat bo‘lgan ofis va savdo-ko‘ngilochar markazlari bor. Aktivlarning umumiy qiymati 1 milliard grivnadan (taxminan 27 mln dollar) ortiqni tashkil qiladi.
Razvedka xizmati rossiyalik general o‘z qarindoshlaridan Moskvadagi korrupsion sxemalardan olingan mablag‘larni qonuniylashtirish uchun foydalanganini aniqladi.
Kapashinning mol-mulki uning Ukrainada yashagan qizi va kuyovi nomiga rasmiylashtirilgan, biroq urush arafasida ular Rossiyaga jo‘nab ketgan va Rossiya fuqaroligini olishgan.
“Bundan tashqari, Kapashinning qarindoshlari ‘oilaviy’ biznes daromadlarini Rossiya va vaqtincha bosib olingan Donbassdagi ‘investitsiya’ loyihalarini moliyalashtirish uchun ishlatgan. Keyinchalik bu pullarning bir qismi soliq va yig‘imlarni to‘lash sifatida Rossiya budjetiga yo‘naltirilgan”, — deyiladi xabarda.
Qidiruv davomida quyidagilar aniqlandi:
- Rossiya namunasidagi harbiy forma;
- Taqiqlangan sovet ramzlari va Rossiyaning targ‘ibot adabiyoti;
- Esdalik sovg‘alari va Kremlda Kapashinga topshirilgan mukofotlar.
Ukraina Jinoyat kodeksining bir nechta moddalari bo‘yicha tergov harakatlari davom etmoqda.
Izoh (0)