Xitoy AQSH josusini qo‘lga olganini e’lon qildi

Xitoy rasmiylari AQSH Markaziy razvedka boshqarmasi uchun josuslik qilgan shaxs fosh etilganini ma’lum qildi.

Xitoy Davlat xavfsizlik vazirligining 11-avgust, juma kuni e’lon qilgan bayonotiga ko‘ra, 52 yoshli Zeng ismli Xitoy fuqarosi AQSH razvedkasi uchun josuslik qilgan.

Vazirlik fuqaroga nisbatan qo‘llangan jazo haqida batafsil ma’lumot bermagan, faqat “xavfni o‘z vaqtida bartaraf etish maqsadida unga nisbatan qo‘llangan majburlov choralari”ni tilga olgan. O‘z bayonotida vazirlik o‘tgan oy qabul qilingan kontrrazvedka to‘g‘risidagi qonunni keltirib o‘tdi. Bu qonun  milliy xavfsizlikka tahdid deb hisoblangan har qanday faoliyatni bostirish uchun hukumatga misli ko‘rilmagan vakolatlarni beradi.

Xitoyning kontrrazvedka to‘g‘risidagi qonuniga ko‘ra, “milliy xavfsizlik va milliy manfaatlarga taalluqli hujjatlar, ma’lumotlar, materiallar va ashyolarni” ruxsatsiz olish josuslik sifatida baholanishi mumkin.

Vazirlik bayonotiga ko‘ra, Zeng Italiyaga o‘qish uchun yuborilgan va u yerda AQSHning Rimdagi elchixonasida ishlaydigan Markaziy razvedka boshqarmasi agenti bilan do‘stlashgan. U Zengni Xitoy harbiylari haqida “maxfiy ma’lumot” berishga ko‘ndirgan. Buning evaziga Zengga “katta miqdorda pul” va oilasi bilan AQSHga ko‘chib o‘tishda yordam va’da qilingan.

Ma’lumotlarga ko‘ra, Zeng Amerika tomoni bilan shartnoma imzolagan va Xitoyga qaytishdan oldin o‘z mamlakati uchun josuslik qilishga o‘rgatilgan.