Xitoy—AQSH munosabatlari ikki davlat o‘rtasida diplomatik aloqalar o‘rnatilganidan beri eng past darajaga tushdi, dedi Xitoy tashqi ishlar vaziri Sin Gan AQSH Davlat kotibi Entoni Blinken bilan uchrashuvda.
“Hozirda Xitoy va AQSH munosabatlari mamlakatlarimiz o‘rtasida diplomatik munosabatlar o‘rnatilganidan beri eng past darajada. Bu Xitoy va AQSH xalqlari manfaatlariga to‘g‘ri kelmaydi”, — deya uning so‘zlarini keltirdi Xitoy markaziy televideniyesi.
Xitoy TIV rahbari mamlakatlar o‘rtasidagi siyosiy ziddiyat boshqa davlatlarga ham foyda keltirmasligini ta’kidladi.
“Amerika tomoni Xitoyga nisbatan xolis va oqilona pozitsiyani saqlab qoladi, deb umid qilamiz”, — dedi vazir.
Sin Gan Xitoy—AQSH munosabatlaridagi asosiy muammo Tayvan ekanini qo‘shimcha qildi. Uning ta’kidlashicha, AQSH orol mustaqilligini qo‘llab-quvvatlamasligi kerak.
“Tayvan muammosi Xitoy manfaatlarining asosini tashkil etadi, bu Xitoy—AQSH munosabatlaridagi eng katta muammo, shuningdek, eng katta xavfdir”, — deb xulosa qildi Gan.
O‘z navbatida, AQSH Davlat departamenti muzokaralarni “konstruktiv, puxta va samimiy” deb baholadi.
Entoni Blinken uchrashuvda Amerika tomoni xalqaro tartib o‘rnatishga intilish bilan birga o‘z mamlakati va fuqarolari manfaatlarini himoya qilishini ta’kidladi. U tushunmovchiliklarga yo‘l qo‘ymaslik uchun turli masalalar bo‘yicha ochiq muloqot kanallarini saqlashga chaqirdi, shuningdek, Sin Ganni muzokaralarni davom ettirish uchun Vashingtonga taklif qildi.
AQSH Davlat kotibi Entoni Blinken 18-iyun yakshanba kuni Pekinga kelgandi.
U fevral oyida mamlakatga tashrif buyurishi kerak edi, biroq AQSH osmonida Xitoyning “josus” havo shari topilgach, safarni bekor qildi. Financial Times o‘z manbalariga tayanib yozishicha, tashrif chog‘ida Davlat departamenti rahbari Xitoy raisi Si Szinpin bilan uchrashishi rejalashtirilgan.
Izoh (0)