Turkiyaning Yozgat viloyatida yo‘lovchi avtobusi bilan sodir bo‘lgan YTHda 12 kishi halok bo‘ldi, deb xabar berdi A Haber telekanali.
“Yozgat viloyatining Sorg‘un tumanida yo‘lovchi avtobusi jarlikka qulab tushdi, oqibatda 12 nafar odam halok bo‘ldi”, — deyiladi xabarda.
Yo‘l-transport hodisasi oqibatida yana 19 kishi jarohatlangan. Jabrlanganlar Sorg‘un davlat kasalxonasiga yotqizilgan.
Voqea joyiga borgan Yozgat gubernatori Mehmet Ali O‘zkan voqea sabablarini aniqlash uchun tergov o‘tkazilishi kerakligini aytdi. Adliya vaziri Yilmaz Tunchning aytishicha, tergov harakatlari allaqachon boshlangan.
Turkiyada avtobusning balandlikdan qulashi bilan bog‘liq hodisalar 30-iyul va 10-avgust kuni ham sodir bo‘lgandi.
30-iyul kuni Kars viloyatida yuz bergan halokatda haydovchi boshqaruvni yo‘qotib qo‘ygan va avtobus 50 metrlik qoyadan qulagandi. Oqibatda yetti kishi halok bo‘lgan, yana 22 kishi jarohatlangan.
10-avgust kuni Istanbulning Eyupsulton tumanida aeroport qurilishida ishtirok etgan ishchilarni olib ketayotgan avtobus ag‘darilib ketgandi.
Izoh (0)