Navoiyda U21 chempionatida stadionga vertolyot qo‘ngani aytilgan fotolar ijtimoiy tarmoqlarda ko‘plab muhokamalarga sabab bo‘ldi. Bu bo‘yicha “Qizilqum” PFK matbuot xizmati “Daryo”ga izoh berdi.
Ma’lum qilinishicha, Navoiy viloyati Karmana tumanida joylashgan “Yoshlik” o‘yingohida 2023-yil 14-avgust kuni soat 17:30 da Navoiyning “Qizilqum” hamda Bekobodning “Metallurg” yoshlar futbol jamoalarining (U21) Yoshlar ligasi doirasidagi uchrashuviga start berilgan.
Soat 18:15 da jamoalar tanaffusga chiqqan. Soat 18:20 da Ichki ishlar vazirligi tomonidan tasdiqlangan rejaga asosan, Navoiy viloyatida olib borilayotgan keng qamrovli profilaktik tadbirlar doirasida belgilangan dislokatsiyaga ko‘ra “Yoshlik” o‘yingohining asosiy futbol maydonidan 15 metrcha uzoqlikda joylashgan qo‘shimcha mashg‘ulotlar maydoniga, ya’ni xavfsiz hududga uchuvchilar almashishi munosabati bilan vertolyot qo‘ngan va 3-5 daqiqadan so‘ng yana o‘z yo‘nalishida davom etgan.
Vertolyotning qo‘nishi futbolchilarga ham, tomoshabinlarga ham noqulaylik tug‘dirmagan.
Qolaversa, tanaffus payti bo‘lgani sababidan bu holat futbol uchrashuviga hech qanday ta’sir o‘tkazmagan (xalaqit qilmagan).
Vertolyotning qo‘nish jarayonida barcha xavfsizlik choralari ko‘rilgan bo‘lib, qo‘shimcha mashg‘ulotlar maydoni hamda qo‘nish nuqtasida o‘yinchilar yoki fuqarolar bo‘lmagan.
Izoh (0)