Korrupsiyaga qarshi kurashish agentligi tomonidan Dang‘ara tuman yo‘llardan foydalanish unitar korxonasi buyurtmachiligida o‘tkazilgan 6 milliard so‘mlik davlat xaridida qator qonunbuzilishi holatlariga yo‘l qo‘yilgani aniqlandi. Bu haqda agentlik matbuot xizmati xabar berdi.
Xususan, ushbu xaridda ishtirok etib, g‘olib bo‘lgan talabgorning hujjatlari xarid komissiyasi raisi va aʼzolari foydalangan qurilma (IP-manzillari bir xil) orqali elektron platformaga yuklangan.
Natijada “Davlat xaridlari to‘g‘risida”gi qonunning 10-moddasi (raqobat va xolislik prinsipi), 14-moddasi (manfaatlar to‘qnashuvi), 20-moddasi (xarid komissiyasining huquq va majburiyatlari), 46-moddasi (davlat xaridlari jarayonidagi cheklovlar) hamda Vazirlar Mahkamasining “Davlat xaridlarini amalga oshirish bilan bog‘liq tartib-taomillarni tashkil etish va o‘tkazish tartibi to‘g‘risida”gi qarori bilan tasdiqlangan nizomning bir qator talablari buzilgan.
Mazkur holatlar bo‘yicha 2023-yil 1-avgust kuni (bayonnoma tasdiqlangan kunning o‘zida) xarid komissiyasining bayonnomasini bekor qilish to‘g‘risida buyurtmachiga taqdimnoma kiritilgan va to‘plangan hujjatlar qonuniy chora ko‘rish uchun Bosh prokuratura huzuridagi Iqtisodiy jinoyatlarga qarshi kurashish departamentiga yuborilgan.
Agentlikning taqdimnomasiga binoan Dang‘ara tuman yo‘llardan foydalanish unitar korxonasi tomonidan 8-avgust kuni xarid komissiyasining bayonnomasi bekor qilingan.
Davlat xaridlarining bekor qilinishi
Bundan oldin “Toshkent don mahsulotlari” AJ buyurtmachiligida yuk tashish xizmati ko‘rsatish yuzasidan o‘tkazilgan 500 million so‘mlik davlat xaridida qator qonun buzilishi holatlari aniqlangandi. Shuningdek, Namangan xalqaro aeroporti o‘tkazgan qariyb 1,5 milliard so‘mlik, Farg‘onada esa asfalt xaridi bo‘yicha o‘tkazilgan salkam 3,5 milliard so‘mlik tenderlar bekor qilingani to‘g‘risida xabar berilgandi.
Izoh (0)