Навоийда U21 чемпионатида стадионга вертолёт қўнгани айтилган фотолар ижтимоий тармоқларда кўплаб муҳокамаларга сабаб бўлди. Бу бўйича “Қизилқум” ПФК матбуот хизмати “Дарё”га изоҳ берди.
Маълум қилинишича, Навоий вилояти Кармана туманида жойлашган “Ёшлик” ўйингоҳида 2023 йил 14 август куни соат 17:30 да Навоийнинг “Қизилқум” ҳамда Бекободнинг “Металлург” ёшлар футбол жамоаларининг (U21) Ёшлар лигаси доирасидаги учрашувига старт берилган.
Соат 18:15 да жамоалар танаффусга чиққан. Соат 18:20 да Ички ишлар вазирлиги томонидан тасдиқланган режага асосан, Навоий вилоятида олиб борилаётган кенг қамровли профилактик тадбирлар доирасида белгиланган дислокацияга кўра “Ёшлик” ўйингоҳининг асосий футбол майдонидан 15 метрча узоқликда жойлашган қўшимча машғулотлар майдонига, яъни хавфсиз ҳудудга учувчилар алмашиши муносабати билан вертолёт қўнган ва 3-5 дақиқадан сўнг яна ўз йўналишида давом этган.
Вертолётнинг қўниши футболчиларга ҳам, томошабинларга ҳам ноқулайлик туғдирмаган.
Қолаверса, танаффус пайти бўлгани сабабидан бу ҳолат футбол учрашувига ҳеч қандай таъсир ўтказмаган (халақит қилмаган).
Вертолётнинг қўниш жараёнида барча хавфсизлик чоралари кўрилган бўлиб, қўшимча машғулотлар майдони ҳамда қўниш нуқтасида ўйинчилар ёки фуқаролар бўлмаган.
Изоҳ (0)