Samarqand shahrida joylashgan Silk Road by Minyoun mehmonxonasida O‘zbekiston—Turkiya tibbiyot forumining ikkinchi kuni boshlandi. SSV matbuot xizmatining ma’lum qilishicha, tadbirni O‘zbekiston Sog‘liqni saqlash vaziri Amrillo Inoyatov kirish so‘zi bilan ochib bergan.
Qayd etilishicha, bugungi kunda O‘zbekistonda jami 8,3 mingta nodavlat tibbiyot tashkiloti faoliyat yuritmoqda. Shundan 1618 tasi statsionar muassasa bo‘lib, ularda 45 mingdan ortiq shifo o‘rni yaratilgan.
Qolaversa, xususiy sektorda 17 ming nafardan ortiq shifokor, 26 mingdan ortiq o‘rta tibbiyot xodimlari mehnat qilmoqda. Respublika bo‘yicha 20 dan ortiq xorijiy investitsiyasi ishtirokidagi 159 ta xususiy shifoxona faoliyat yurityapti.
Toshkent shahrida xususiy shifoxonalar 1,7 mingtadan ortgan bo‘lsa, ularning soni Andijonda 750 tadan, Samarqand, Qashqadaryo va Toshkent viloyatlarida esa 650 dan oshgan.
Hozir xususiy tibbiyot muassasalari 200 tadan ortiq ixtisosliklar bo‘yicha 2250 dan ziyod tibbiy xizmat turlarini ko‘rsatib kelmoqda. Natijada mamlakatda xususiy sektorning umumiy sog‘liqni saqlashdagi ulushi 30 foizga yetdi. Xususiy tibbiyot tashkilotlarining soni har yili o‘rtacha 600-700 taga ortib borishi kuzatilmoqda.
May oyida har bir hududda davlat-xususiy sheriklik asosida 1000-1500 o‘rinli ko‘p tarmoqli shifoxonalarni barpo etish bo‘yicha loyihalar ishlab chiqilayotgani to‘g‘risida xabar berilgandi. Shuningdek, kelgusi yetti yilda tuman va shaharlarda 700 ta yangi poliklinika tashkil etilishi aytilgan edi.
Izoh (0)