Hindistonning “Chandrayaan-3” Oy missiyasi Rossiyaning “Luna-25” missiyasi bilan Oyning janubiy qutbiga o‘z roverini birinchi qo‘ndirish uchun qattiq poygaga kirishgan, deb yozmoqda Independent nashri.
14-iyul kuni Hindiston bosh kosmodromidan uchirilgan “Chandrayaan-3” missiyasi 16-avgust kuni Oy atrofidagi orbital manyovrlarini yakunlab, kosmik kemaning Propulsion va Lander modullarini o‘zidan ajratishga sharoit yaratdi.
“Lander modulini missiyadan ajratish 2023-yil 17-avgustga rejalashtirilgan”, — deb eʼlon qildi Hindistonning ISRO kosmik agentligi Twitter’da (hozirgi X).
Missiya roveri 23-avgust kuni Oy yuzasiga yetib borsa, Hindiston Oyning janubiy qutbiga zond qo‘ndirgan birinchi davlatga aylanadi.
Ammo o‘tgan hafta uchirilgan Rossiyaning “Luna-25” missiyasi 16-avgust kuni Oy atrofidagi aylana qutbli orbitaga chiqdi, u Oyning janubiy qutbiga hind missiyasidan bir-ikki kun oldin yaqinlashishi mumkin.
Rossiyaning so‘nggi 50 yil ichidagi birinchi Oy missiyasi bo‘lgan “Luna-25” 11-avgust kuni Moskvadan 5 550 km sharqda joylashgan Vostochniy kosmodromidan uchirildi. “Roskosmos” boshlig‘i Yuriy Borisovning so‘zlariga ko‘ra, missiya 21-avgust kuni Oyning janubiy qutbi yaqiniga yetib borishi kutilmoqda.
“Endi 21-sanani kutyapmiz. Umid qilamanki, Oyga yuqori aniqlikdagi yumshoq qo‘nish amalga oshiriladi. Umid qilamizki, biz birinchi bo‘lamiz”, — dedi Borisov.
Agar Rossiya missiyasi muvaffaqiyatli o‘tsa, u Oyning janubiy qutbiga zond qo‘ndirgan birinchi davlat sifatida tarixga kirishi mumkin, Hindistonning “Chandrayaan-3” missiyasi esa ikkinchi bo‘ladi. Shu bilan birga, Hindiston AQSH, sobiq Sovet Ittifoqi va Xitoydan keyin Oyga muvaffaqiyatli zond qo‘ndirgan to‘rtinchi davlatga aylanadi.
Kuzatuvchilarning ta’kidlashicha, ikkala missiyaning ham qo‘nish sanalari aniq emas, ular o‘rtasidagi poygani ham Sovuq urush davridagi bellashuvga qiyoslab bo‘lmaydi.
Oyning janubiy qutbi so‘nggi yillarda ko‘plab olimlar orasida qiziqish uyg‘otmoqda, chunki uning tasvirlaridan suv muzlarining izi aniqlangan.
Shu paytgacha hech bir davlat Oyning janubiy qutbiga missiyasini yumshoq qo‘ndirmagan. Oyning ushbu qismida suv muzlarini kashf qilish ikkala missiya uchun ham tarixiy bo‘lishi, Yerdagi odamlarni Oy yuzasidan yonilg‘i va kislorod qidirishga undashi mumkin.
Izoh (0)