G‘arb davlatlari Liviya sobiq rahbari Muammar Kaddafining o‘ldirilishiga “ruxsat berib”, o‘ta jiddiy xatoga yo‘l qo‘ygan, deb hisoblaydi Italiya tashqi ishlar vaziri Antonio Tayani.
“Ha u demokratiya kurashchisi bo‘lmagandir, ammo uning o‘ldirilishi bilanoq Liviya va umuman Afrikada siyosiy beqarorlik yuzaga keldi”, — dedi italiyalik vazir.
U avval ham G‘arb davlatlarining Liviyaga nisbatan siyosatini tanqid qilgandi. Masalan, 2019-yilda o‘sha paytda Yevroparlament prezidenti bo‘lgan Tayani Kaddafini ag‘darishda Fransiya va Buyuk Britaniyaning rolini tilga olgan va buni tartibsizliklarga sabab bo‘lgan xato, deb aytgandi. Yana bir davrada Tayani Kaddafining o‘ldirilishi migratsiya inqiroziga, terrorchi tashkilotlarning kuchayishiga hissa qo‘shganini ta’kidlagan.
Kaddafi o‘ldirilgach, Liviyada hokimiyat bo‘linib ketdi
Liviyani 42 yil boshqargan Kaddafi 2011-yilda hokimiyatdan chetlashtirilgan — uning raqiblari NATO tomonidan qo‘llab-quvvatlangan O‘tish davri milliy kengashini tuzib, uni mamlakatdagi qonuniy hokimiyat deb eʼlon qilgan. 2011-yil 20-oktabrda Kaddafi Sirt shahri yaqinida o‘ldirildi.
2010-yilda Kaddafi Yevropa Ittifoqini Afrika davlatlaridan noqonuniy migratsiyaga qarshi kurashish uchun har yili 5 milliard yevro ajratishga chaqirgan, aks holda “Yevropa Afrikaga aylanishi mumkinligidan” ogohlantirgandi.
2011-yilda Kaddafi ag‘darilganidan so‘ng Liviyada hokimiyat raqib kuchlar o‘rtasida bo‘linib ketdi. Birlashgan Millatlar Tashkiloti tomonidan tan olingan Milliy kelishuv hukumati Tripolida joylashgan, mamlakatning janubiy va sharqiy hududlari esa Liviya Milliy armiyasi bosh qo‘mondoni Xalifa Xaftar kuchlari nazorati ostida qolgan. BMT rahbarligidagi muzokaralardan so‘ng urushayotgan tomonlar doimiy o‘t ochishni to‘xtatish bo‘yicha kelishuvni imzoladi. Mamlakatda prezidentlik saylovlari 2021-yilda bo‘lib o‘tishi kerak edi, biroq ular o‘tkazilmadi, chunki umumxalq saylovining huquqiy asosini tashkil etuvchi qonun borasida kelishib olinmadi.
Izoh (0)