Germaniya hukumati marixuanani qisman qonuniylashtirish to‘g‘risidagi qonun loyihasini ma’qulladi, deb xabar bermoqda hukumat matbuot xizmati. Endi hujjat parlamentda ko‘rib chiqilishi kerak.
Qonun loyihasi 18 yoshdan oshganlarga shaxsiy maqsadda foydalanish uchun uch tupgacha nasha o‘simligini yetishtirishga ruxsat beradi. 25 grammgacha miqdorda nasha saqlaganlar endi jinoiy javobgarlikka tortilmaydi.
Bundan tashqari, hujjatda kannabis yetishtirib, o‘z a’zolarini ushbu mahsulot bilan ta’minlaydigan uyushmalar tashkil etilishi ko‘zda tutilgan. Uyushmalar a’zosi 500 dan oshib ketmasligi kerak, ular klubdan oyiga 50 grammgacha nasha oladi. Uyushmaning 21 yoshgacha bo‘lgan a’zolari nasha mahsulotlaridagi TGK (nasha barglarida bo‘ladigan psixoaktiv modda) miqdori 10 foizdan oshmasligi sharti bilan faqat 30 gramm kannabis olishi mumkin bo‘ladi.
Uyushma a’zolariga klublar hududida va ulardan 200 metr masofada nasha ishlatish taqiqlanadi. Klublarning o‘zi maktab va bog‘chalardan kamida 200 metr uzoqlikda bo‘lishi kerak, deb yozadi Deutsche Welle.
Nashrning aniqlik kiritishicha, qonun loyihasi birinchi navbatda marixuana atrofidagi jinoyatlarni qisqartirishga qaratilgan. Keyingi qadam — qonuniylashtirish bo‘ladi. Shundan so‘ng ixtisoslashtirilgan do‘konlar tarkibida nasha va TGK bo‘lgan mahsulotlarni sotishi mumkin, ammo faqat ma’lum hududlar va shaharlarda.
2021-yilda Germaniyada Germaniya Sotsial-demokratik partiyasi, Yashillar va liberal Erkin demokratik partiyadan iborat hukumat koalitsiyasi tuzilgandi. Koalitsiyaga o‘sha paytda moliya vaziri bo‘lgan kansler Olaf Shols boshchilik qildi. Tomonlarning koalitsiya kelishuvida, boshqa narsalar qatori, Germaniyada kannabisdan ko‘ngilochar maqsadlarda foydalanishga ruxsat berilishi nazarda tutilgan edi.
Izoh (0)