Namangan yo‘l qurish-ta’mirlash korxonasi 19—24-aprel oralig‘ida boshlang‘ich qiymati 1 milliard 920 million 800 ming so‘m bo‘lgan tender o‘tkazgan. “Daryo” muxbiri lot ma’lumotlarini monitoring qilish davomida tenderni yutgan korxona amalda faoliyat ko‘rsatmayotganini aniqladi.
Davlat xaridi 2023-yil davomida yo‘l qurish ishlarida ishlatish uchun asfaltobeton mahsulotlari sotib olish maqsadida o‘tkazilgan. G‘olib korxona tender yakunlanganidan so‘ng 20 kun ichida mahsulotlarni yetkazib berishi kerak.
Savdolarda uchta tadbirkorlik subyekti ishtirok etgan. Komissiya a’zolarining yakuniy natijalariga ko‘ra, tenderni 100 ball bilan “Raximberdi Logistika” MChJ yutib olgan. Shartnoma summasi 1 milliard 881 million 600 ming so‘m.
G‘olib korxonaning rahbariyati haqidagi ma’lumotlar bilan tanishish jarayonida shubhali holatga duch keldik. Statistika agentligiga ko‘ra, “Raximberdi Logistika” korxonasi 2019-yilda tashkil etilgan bo‘lib, hozirda rasman faoliyat ko‘rsatmaydi.
“Daryo” muxbiri holat yuzasidan izoh olish maqsadida Namangan yo‘l qurish-ta’mirlash korxonasi va “Raximberdi Logistika” MChJning aloqa telefon raqamlariga qo‘ng‘iroq qildi, ammo bog‘lanishning imkoni bo‘lmadi.
Mas’ullardan ushbu shubhali tender natijalariga e’tibor qaratishni so‘raymiz.
Izoh (0)